വയോമിംഗ്: യെല്ലോസ്റ്റോൺ, ഗ്രാൻഡ് ടെറ്റൺ നാഷണൽ പാർക്കുകൾക്കിടയിലുള്ള കോണ്ടിനെന്റൽ ഡിവൈഡ് ട്രെയിലിൽ ട്രെക്കിംഗിനിടെ കാണാതായ 28 വയസ്സുള്ള ഓസ്ട്രേലിയൻ സ്വദേശിയായ വില്യം സ്റ്റാൻഡിഷിനെ മരിച്ച നിലയിൽ കണ്ടെത്തി. ടെറ്റൺ പർവ്വതനിരകളുടെ പടിഞ്ഞാറൻ ചരിവിലുള്ള വിഗ്വാംസ് മേഖലയിൽ നിന്ന് ബുധനാഴ്ച രാവിലെയാണ് ഹെലികോപ്റ്റർ രക്ഷാപ്രവർത്തകർ ഇദ്ദേഹത്തിന്റെ മൃതദേഹം കണ്ടെത്തിയത്. കുത്തനെയുള്ള പർവ്വതനിരയിൽ നിന്ന് താഴേക്ക് വീണതാണ് മരണകാരണമെന്ന് കരുതുന്നു.
ജൂലൈ 23-ന് ശേഷമാണ് വില്യം സ്റ്റാൻഡിഷിനെക്കുറിച്ച് കുടുംബത്തിന് വിവരമൊന്നും ലഭിക്കാതായത്. തുടർന്ന് നടത്തിയ തെരച്ചിലിൽ ഇദ്ദേഹത്തിന്റെ ഓറഞ്ച് നിറത്തിലുള്ള ബാക്ക്പാക്ക് ശ്രദ്ധയിൽപ്പെട്ടതിനെ തുടർന്നാണ് മൃതദേഹം കണ്ടെത്തിയത്. ഇദ്ദേഹത്തിന്റെ കുടുംബത്തിന് ടെറ്റൺ കൗണ്ടി സെർച്ച് ആൻഡ് റെസ്ക്യൂ ടീം അനുശോചനം അറിയിച്ചു.
വടക്കേ അമേരിക്കയിലെ പർവ്വതനിരകളിൽ സമീപദിവസങ്ങളിൽ മറ്റ് നിരവധി ദുരന്തങ്ങളും റിപ്പോർട്ട് ചെയ്യപ്പെട്ടിട്ടുണ്ട്:കൊളറാഡോയിലെ മൗണ്ട് ബ്ലൂ സ്കൈയിൽ മിന്നലേറ്റ് 15 വയസ്സുകാരനായ ലെവി സ്ട്രോബൽ എന്ന കൗമാരക്കാരൻ മരിച്ചു. അപകടത്തിൽ ലെവിയുടെ സഹോദരനുൾപ്പെടെ നാല് പേർക്ക് ഗുരുതരമായി പരിക്കേറ്റു.അരിസോണയിലെ ഫീനിക്സിലുള്ള സൗത്ത് മൗണ്ടനിൽ ട്രെക്കിംഗിനിടെ 61-കാരനായ റിച്ചാർഡ് ഫ്ലെച്ചർ മരണപ്പെട്ടു. കടുത്ത ചൂടോ മറ്റ് ശാരീരിക അസ്വസ്ഥതകളോ ആകാം മരണകാരണമെന്ന് അധികൃതർ അറിയിച്ചു.
ന്യൂ ഹാംഷെയറിലെ വൈറ്റ് മൗണ്ടൻസിലുള്ള വെൽഷ്-ഡിക്കി ട്രെയിലിൽ ശാരീരിക അസ്വസ്ഥതകളെ തുടർന്ന് 62-കാരൻ മരണപ്പെട്ടു.കാനഡയിലെ ബാൺഫ് നാഷണൽ പാർക്കിൽ രണ്ടിടങ്ങളിലായി നടന്ന മലകയറ്റ അപകടങ്ങളിൽ ഒരു ഇരുപതുകാരിയും 65-കാരനും പർവ്വതനിരകളിൽ നിന്ന് വീണു മരിച്ചു.
