ടോക്കിയോ: 2026 ഫെബ്രുവരി മാസത്തിന്റെ തുടക്കം മുതൽ ജപ്പാനിൽ തുടരുന്ന അസാധാരണമായ മഞ്ഞുവീഴ്ച ഇന്നും കനത്ത നാശനഷ്ടങ്ങൾ വിതയ്ക്കുന്നു. ജനുവരി 20 മുതൽ ഫെബ്രുവരി 6 വരെയുള്ള കണക്കുകൾ പ്രകാരം രാജ്യത്തുടനീളം 42 പേർ മഞ്ഞുവീഴ്ചയുമായി ബന്ധപ്പെട്ട അപകടങ്ങളിൽ കൊല്ലപ്പെട്ടു. 480-ലധികം പേർക്ക് പരിക്കേറ്റതായും ഔദ്യോഗിക റിപ്പോർട്ടുകൾ വ്യക്തമാക്കുന്നു. വടക്കൻ ജപ്പാനിലെ അയോമോറി സിറ്റിയിൽ കഴിഞ്ഞ 40 വർഷത്തിനിടയിലെ ഏറ്റവും ഉയർന്ന മഞ്ഞുവീഴ്ചയാണ് രേഖപ്പെടുത്തിയത്. ഇവിടെ മഞ്ഞുപാളികൾ 7 അടിയോളം (ഏകദേശം 2 മീറ്റർ) ഉയരത്തിൽ അടിഞ്ഞുകൂടിയിരിക്കുകയാണ്.
അതിശൈത്യം തുടരുന്ന പശ്ചാത്തലത്തിൽ വടക്കൻ, പടിഞ്ഞാറൻ ജപ്പാനിലെ ഗതാഗത സംവിധാനങ്ങൾ പൂർണ്ണമായും തടസ്സപ്പെട്ടു. ഈസ്റ്റ് ജപ്പാൻ റെയിൽവേ ടോക്കിയോ ഉൾപ്പെടെയുള്ള മെട്രോപൊളിറ്റൻ ഏരിയകളിൽ ട്രെയിൻ സർവീസുകൾക്ക് നിയന്ത്രണം ഏർപ്പെടുത്തിയിട്ടുണ്ട്. റോഡുകൾ മഞ്ഞുമൂടിക്കിടക്കുന്നതിനാൽ വാഹനങ്ങൾ അപകടത്തിൽപ്പെടുന്നത് പതിവാകുകയാണ്. വീടിന്റെ മേൽക്കൂരയിൽ നിന്ന് മഞ്ഞ് നീക്കം ചെയ്യുന്നതിനിടെ വീണും, മഞ്ഞ് ഇടിഞ്ഞുവീണുമാണ് ഭൂരിഭാഗം മരണങ്ങളും സംഭവിച്ചിരിക്കുന്നത്. ഇതേത്തുടർന്ന് ദുരിതബാധിത പ്രദേശങ്ങളിൽ മഞ്ഞ് നീക്കം ചെയ്യുന്നതിനായി ജപ്പാൻ സർക്കാർ സൈന്യത്തെ (Self-Defense Forces) വിന്യസിച്ചു.
വരാനിരിക്കുന്ന ഞായറാഴ്ച രാജ്യത്ത് പൊതുതിരഞ്ഞെടുപ്പ് നടക്കാനിരിക്കെ, കനത്ത മഞ്ഞുവീഴ്ച വോട്ടിംഗിനെ ബാധിക്കുമോ എന്ന ആശങ്കയും നിലനിൽക്കുന്നുണ്ട്. ഹൊക്കൈഡോ, ഹോകുരിക്കു തുടങ്ങിയ മേഖലകളിൽ വരും മണിക്കൂറുകളിൽ 50 മുതൽ 70 സെന്റീമീറ്റർ വരെ കൂടുതൽ മഞ്ഞുവീഴ്ച ഉണ്ടാകുമെന്ന് ജപ്പാൻ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. ശ്വാസം മുട്ടിച്ചും കെട്ടിടങ്ങൾ തകർന്നും ഉണ്ടാകാവുന്ന അപകടങ്ങൾ ഒഴിവാക്കാൻ ജനങ്ങൾ വീടിന് പുറത്തിറങ്ങുമ്പോൾ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
