ഗുവാഹത്തി: വടക്കുകിഴക്കൻ സംസ്ഥാനങ്ങളിലെ റെയിൽ ഗതാഗത മേഖലയിൽ നിർണ്ണായക ചുവടുവെപ്പുമായി കേന്ദ്ര റെയിൽവേ മന്ത്രി അശ്വിനി വൈഷ്ണവ്. മിസോറാമിലെ സൈരാംഗിനെയും അസമിലെ സിൽചാറിനെയും തമ്മിൽ ബന്ധിപ്പിക്കുന്ന പുതിയ പാസഞ്ചർ ട്രെയിൻ സർവീസിന് അദ്ദേഹം തുടക്കം കുറിച്ചു. വീഡിയോ കോൺഫറൻസിംഗിലൂടെയാണ് മന്ത്രി ഫ്ലാഗ് ഓഫ് കർമ്മം നിർവഹിച്ചത്.
പുതിയ ട്രെയിൻ സർവീസ് ആഴ്ചയിൽ അഞ്ച് ദിവസമായിരിക്കും സർവീസ് നടത്തുക. മിസോറാമും അസമും തമ്മിലുള്ള യാത്രാസൗകര്യങ്ങൾ മെച്ചപ്പെടുത്തുന്നതിനും ചരക്കുനീക്കം സുഗമമാക്കുന്നതിനും ഈ പുതിയ റെയിൽ പാത വലിയ സഹായമാകും. മേഖലയിലെ വിനോദസഞ്ചാര-സാമ്പത്തിക രംഗങ്ങളിലും ഇത് വലിയ മാറ്റങ്ങൾ കൊണ്ടുവരുമെന്ന് റെയിൽവേ മന്ത്രി പറഞ്ഞു.
ട്രെയിൻ സർവീസിന് പുറമെ, ഗുവാഹത്തി റെയിൽവേ സ്റ്റേഷനിൽ ‘ബ്ലെൻഡഡ് ഹോസ്പിറ്റാലിറ്റി സർവീസും’ (Blended Hospitality Service) മന്ത്രി ഉദ്ഘാടനം ചെയ്തു. യാത്രക്കാർക്ക് കൂടുതൽ മെച്ചപ്പെട്ട ഭക്ഷണവും താമസസൗകര്യങ്ങളും ഉറപ്പാക്കുന്ന പദ്ധതിയാണിത്. വടക്കുകിഴക്കൻ മേഖലയിലെ റെയിൽവേ സ്റ്റേഷനുകളുടെ നിലവാരം വർദ്ധിപ്പിക്കുന്നതിന്റെ ഭാഗമായാണ് ഈ നടപടി.
