ടൗൺസ്വില്ലെ: ഓസ്ട്രേലിയയിലെ ഏറ്റവും വലിയ പ്രതിരോധ താവളമായ ലാവറാക്ക് ബാരക്സിൽ (Lavarack Barracks) ഗ്രൂപ്പ് ഫോട്ടോ എടുക്കുന്നതിനിടെ ഗാലറി തകർന്ന് വീണ് നിരവധി സൈനികർക്ക് പരിക്കേറ്റു. വെള്ളിയാഴ്ച ഉച്ചയ്ക്ക് 1.15-ഓടെയാണ് അപകടമുണ്ടായത്. മൂന്നാം ബ്രിഗേഡിലെ രണ്ടാം കാവൽറി റെജിമെന്റിലെ (2nd Cavalry Regiment) സൈനികർ ഫോട്ടോയ്ക്കായി താൽക്കാലികമായി സജ്ജീകരിച്ച ഗാലറിയിൽ കയറിനിന്ന സമയത്ത് അത് പെട്ടെന്ന് തകരുകയായിരുന്നു.
മീറ്ററുകളോളം ഉയരത്തിൽ നിന്ന് താഴേക്ക് പതിച്ച ഏകദേശം 40-ഓളം സൈനികരെ പാരാമെഡിക്സ് സംഘം സ്ഥലത്തെത്തി പരിശോധിച്ചു. പരിക്കേറ്റവരിൽ പലർക്കും കൈകാലുകൾക്കും നട്ടെല്ലിനും ഒടിവുകളും ചതവുകളും സംഭവിച്ചിട്ടുണ്ട്. ഇതിൽ ഗൗരവകരമായ പരിക്കുകളുള്ള ചിലരെ ടൗൺസ്വില്ലെ യൂണിവേഴ്സിറ്റി ഹോസ്പിറ്റലിലേക്ക് മാറ്റി. മറ്റുള്ളവർക്ക് ബാരക്സിലെ ഹെൽത്ത് സെന്ററിൽ തന്നെ പ്രാഥമിക ചികിത്സ നൽകി.
അപകടത്തെക്കുറിച്ച് ഓസ്ട്രേലിയൻ പ്രതിരോധ മന്ത്രാലയം അന്വേഷണം പ്രഖ്യാപിച്ചു. പരിക്കേറ്റ സൈനികർക്കും അവരുടെ കുടുംബങ്ങൾക്കും ആവശ്യമായ എല്ലാ പിന്തുണയും നൽകുമെന്ന് പ്രതിരോധ വക്താവ് അറിയിച്ചു. ആരുടെയും പരിക്ക് ജീവന് ഭീഷണിയുള്ളതല്ലെന്നാണ് പ്രാഥമിക വിവരം
