കാൻബറ: രണ്ടാം ട്രംപ് ഭരണകൂടത്തിന്റെ ആദ്യ വർഷം പിന്നിടുമ്പോൾ, അമേരിക്കയുമായുള്ള ഓസ്ട്രേലിയയുടെ സുരക്ഷാ ബന്ധം കാത്തുസൂക്ഷിക്കുന്നതിൽ നിർണ്ണായക പങ്കുവഹിച്ച് പ്രതിരോധ മന്ത്രി റിച്ചാർഡ് മാർലസ്. എൺപത് വർഷത്തോളമായി നിലനിൽക്കുന്ന ആഗോള സുരക്ഷാ ക്രമങ്ങളിൽ യുഎസ് പ്രസിഡന്റ് ഡൊണാൾഡ് ട്രംപ് മാറ്റങ്ങൾ വരുത്തുമ്പോൾ, ഓസ്ട്രേലിയയുടെ താല്പര്യങ്ങൾ സംരക്ഷിക്കുന്നതിനുള്ള കഠിനശ്രമത്തിലാണ് അദ്ദേഹം.
പ്രതിരോധ സെക്രട്ടറി പീറ്റ് ഹെഗ്സെത്ത്, സ്റ്റേറ്റ് സെക്രട്ടറി മാർക്കോ റൂബിയോ എന്നിവരുമായി അടുത്ത ബന്ധം പുലർത്തുന്ന മാർലസ്, പ്രധാനമന്ത്രി ആന്തണി ആൽബനീസിനും മുൻപേ ട്രംപ് ഭരണകൂടത്തിലെ ഉന്നതരുമായി കൂടിക്കാഴ്ചകൾ നടത്തിയിരുന്നു. പ്രതിരോധ ബജറ്റ് ജിഡിപിയുടെ 3.5 ശതമാനമായി ഉയർത്തണമെന്ന യുഎസ് ആവശ്യം ചർച്ചകളിൽ പ്രധാനവിഷയമായിരുന്നു. അമേരിക്ക കാലങ്ങളായി ഉന്നയിക്കുന്ന ആവശ്യമാണിതെന്നും സഖ്യകക്ഷികൾ സുരക്ഷാ ചുമതലകളിൽ കൂടുതൽ പങ്കുചേരണമെന്നാണ് ഇതിനർത്ഥമെന്നും മാർലസ് വ്യക്തമാക്കി.
ഓസ്ട്രേലിയയുടെ ചരിത്രത്തിലെ ഏറ്റവും വലിയ വ്യവസായ പദ്ധതിയായ 368 ബില്യൺ ഡോളറിന്റെ ഓക്കസ് (AUKUS) കരാറിൽ മാർലസ് പൂർണ്ണ ആത്മവിശ്വാസം പ്രകടിപ്പിച്ചു. ആണവോർജ്ജത്തിൽ പ്രവർത്തിക്കുന്ന അന്തർവാഹിനികൾ ഓസ്ട്രേലിയയ്ക്ക് ലഭ്യമാക്കുന്ന ഈ പദ്ധതി രാജ്യത്തിന്റെ സൈനിക ശേഷിയിലെ ഏറ്റവും വലിയ കുതിച്ചുചാട്ടമായിരിക്കുമെന്ന് അദ്ദേഹം പറഞ്ഞു.
“നമ്മുടെ രാജ്യത്തിന് ഭീഷണിയാകുന്ന ഏതൊരു ശത്രുവിനെയും ഇരുത്തിച്ചിന്തിപ്പിക്കാൻ ഈ അന്തർവാഹിനികൾക്ക് സാധിക്കും. 2030-കളിലും 40-കളിലും ഓസ്ട്രേലിയയുടെ പ്രസക്തി നിലനിർത്താൻ ആണവ അന്തർവാഹിനികൾ അനിവാര്യമാണ്,”
പദ്ധതിക്കെതിരെ ഉയരുന്ന വിമർശനങ്ങളെ അദ്ദേഹം തള്ളി. അന്തർവാഹിനികൾ നിർമ്മിക്കുക എന്നത് പതിറ്റാണ്ടുകൾ നീളുന്ന പ്രയത്നമാണെന്നും ഈ പാതയിൽ നിന്ന് മാറുന്നത് രാജ്യത്തിന്റെ സുരക്ഷയെ ബാധിക്കുമെന്നും അദ്ദേഹം മുന്നറിയിപ്പ് നൽകി. മ്യൂണിക്ക് സുരക്ഷാ സമ്മേളനത്തിൽ പങ്കെടുക്കാനുള്ള തയ്യാറെടുപ്പിനിടെയാണ് അദ്ദേഹം ഈ കാര്യങ്ങൾ വ്യക്തമാക്കിയത്
