മെൽബൺ: ഓസ്ട്രേലിയയിലെ ഒന്നരക്കോടിയോളം വരുന്ന സ്വകാര്യ ആരോഗ്യ ഇൻഷുറൻസ് ഉപഭോക്താക്കൾക്ക് വൻ തിരിച്ചടിയായി കഴിഞ്ഞ ഒരു പതിറ്റാണ്ടിനിടയിലെ ഏറ്റവും വലിയ നിരക്ക് വർദ്ധനവ് നടപ്പിലാക്കുന്നു. ഏപ്രിൽ ഒന്ന് മുതൽ പ്രാബല്യത്തിൽ വരുന്ന പുതിയ പരിഷ്കരണത്തിലൂടെ ശരാശരി 4.41 ശതമാനം വർദ്ധനവിനാണ് ഫെഡറൽ സർക്കാർ അനുമതി നൽകിയിരിക്കുന്നത്. പണപ്പെരുപ്പ നിരക്കിനേക്കാൾ ഉയർന്ന ഈ വർദ്ധനവ് സാധാരണക്കാരായ ഓസ്ട്രേലിയക്കാരുടെ കുടുംബ ബജറ്റിനെ സാരമായി ബാധിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
പുതിയ നിരക്കുകൾ നിലവിൽ വരുന്നതോടെ ശരാശരി ഗോൾഡ് ഹോസ്പിറ്റൽ പോളിസിയുള്ള ഒരു കുടുംബത്തിന് പ്രതിവർഷം 330 ഡോളർ വരെ അധികമായി നൽകേണ്ടി വരും. സിൽവർ കവറേജ് ഉള്ളവർക്ക് 166 ഡോളറും ബ്രോൺസ് പോളിസിയുള്ളവർക്ക് 120 ഡോളറും അധിക ബാധ്യതയുണ്ടാകും. വ്യക്തിഗത പോളിസികളിൽ 59 ഡോളർ മുതൽ 167 ഡോളർ വരെയാണ് വർദ്ധനവ് പ്രതീക്ഷിക്കുന്നത്. പ്രമുഖ ഇൻഷുറൻസ് കമ്പനികളായ എൻ.ഐ.ബി 5.47 ശതമാനവും മെഡി ബാങ്ക് 5.10 ശതമാനവും Bupa 4.80 ശതമാനവും വർദ്ധനവ് പ്രഖ്യാപിച്ചിട്ടുണ്ട്.
സ്വകാര്യ ആശുപത്രികളുടെ നിലനിൽപ്പിനും മെച്ചപ്പെട്ട ചികിത്സാ സൗകര്യങ്ങൾ ഉറപ്പുവരുത്തുന്നതിനും ഈ വർദ്ധനവ് അനിവാര്യമാണെന്ന് ആരോഗ്യ മന്ത്രി മാർക്ക് ബട്ലർ അറിയിച്ചു. സാധ്യമായതിൽ വച്ച് ഏറ്റവും കുറഞ്ഞ വർദ്ധനവാണ് അനുവദിച്ചതെന്നും അദ്ദേഹം അവകാശപ്പെട്ടു. അതേസമയം, വർദ്ധനവ് പ്രാബല്യത്തിൽ വരുന്നതിന് മുൻപ് മുഴുവൻ തുകയും മുൻകൂട്ടി അടയ്ക്കുകയോ അല്ലെങ്കിൽ കുറഞ്ഞ നിരക്കുള്ള മറ്റ് ഇൻഷുറൻസ് കമ്പനികളിലേക്ക് മാറുന്നതിനെക്കുറിച്ച് ആലോചിക്കുകയോ ചെയ്യണമെന്ന് സാമ്പത്തിക വിദഗ്ധർ ഉപഭോക്താക്കൾക്ക് നിർദ്ദേശം നൽകിയിട്ടുണ്ട്.
ഓസ്ട്രേലിയൻ ഹെൽത്ത് മിനിസ്റ്റർ മാർക്ക് ബട്ലർ പ്രഖ്യാപിച്ച ഈ വർദ്ധനവ് ഏപ്രിൽ 1 മുതൽ പ്രാബല്യത്തിൽ വരും. 4.41 ശതമാനം എന്നത് ഇൻഡസ്ട്രിയിലെ ശരാശരി വർദ്ധനവ് മാത്രമാണ്; അതായത് പല പ്രമുഖ ഇൻഷുറൻസ് കമ്പനികളും ഇതിലും ഉയർന്ന നിരക്കാണ് ഈടാക്കുന്നത്. എൻ.ഐ.ബി (5.47%), മെഡിബാങ്ക് (5.10%), എച്ച്.സി.എഫ് (4.96%), Bupa (4.80%) തുടങ്ങിയ മുൻനിര കമ്പനികളെല്ലാം ശരാശരിയേക്കാൾ കൂടുതൽ നിരക്ക് വർദ്ധിപ്പിച്ചിട്ടുണ്ട്. അതേസമയം, കുറഞ്ഞ നിരക്ക് വർദ്ധനവ് വരുത്തിയത് ജി.എം.എച്ച്.ബി.എ (1.98%), എച്ച്.ബി.എഫ് (2.15%) എന്നീ കമ്പനികളാണ്.
ചികിത്സാ ചെലവുകളിലും ആശുപത്രി സേവനങ്ങളിലും ഉണ്ടായ 5 ശതമാനത്തോളം വർദ്ധനവാണ് ഇത്തരമൊരു തീരുമാനത്തിലേക്ക് സർക്കാരിനെ നയിച്ചത്. പ്രീമിയം വർദ്ധനവ് ഒഴിവാക്കാൻ ഉപഭോക്താക്കൾക്ക് ചില വഴികളുണ്ട്. ഏപ്രിൽ ഒന്നിന് മുൻപ് അടുത്ത ഒരു വർഷത്തേക്കുള്ള തുക മുൻകൂട്ടി അടയ്ക്കുകയാണെങ്കിൽ പഴയ നിരക്കിൽ തന്നെ ഇൻഷുറൻസ് തുടരാം. കൂടാതെ, നിലവിലെ പോളിസിയിലെ അനാവശ്യമായ ആനുകൂല്യങ്ങൾ (ഉദാഹരണത്തിന് പ്രായമായവർക്ക് പ്രസവാനുകൂല്യങ്ങൾ ആവശ്യമില്ലാത്ത സാഹചര്യം) ഒഴിവാക്കി ‘ഡൗൺഗ്രേഡ്’ ചെയ്യുന്നതും സാമ്പത്തിക ലാഭമുണ്ടാക്കാൻ സഹായിക്കും.
