ഗോൾഡ് കോസ്റ്റ്: ഓസ്ട്രേലിയയിലെ വിനോദസഞ്ചാര കേന്ദ്രമായ സർഫേഴ്സ് പാരഡൈസിൽ 1.5 ബില്യൺ ഡോളർ (ഏകദേശം 150 കോടി ഡോളർ) ചെലവിൽ നിർമ്മിക്കുന്ന ‘ട്രംപ് ഇന്റർനാഷണൽ ഹോട്ടൽ ആൻഡ് ടവർ’ പദ്ധതിയെച്ചൊല്ലി ഗോൾഡ് കോസ്റ്റിൽ ഭിന്നാഭിപ്രായങ്ങൾ പുകയുന്നു. അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള കൂടിക്കാഴ്ചയ്ക്ക് പിന്നാലെ ഗോൾഡ് കോസ്റ്റ് മേയർ ടോം ടേറ്റ് തന്നെയാണ് ഈ ബൃഹത്തായ പദ്ധതിയുടെ വിവരങ്ങൾ പുറത്തുവിട്ടത്.
ഫ്ലോറിഡയിലെ ട്രംപിന്റെ വസതിയായ മാർ-എ-ലാഗോയിൽ വെച്ച് ഡൊണാൾഡ് ട്രംപിനും മകൻ എറിക് ട്രംപിനും ഒപ്പമുള്ള ചർച്ചകൾക്ക് ശേഷമാണ് ടവർ നിർമ്മാണത്തിന് ഔദ്യോഗിക പച്ചക്കൊടി ലഭിച്ചത്. 91 നിലകളിലായി 340 മീറ്റർ ഉയരത്തിൽ നിർമ്മിക്കുന്ന ഈ കെട്ടിടം പൂർത്തിയായാൽ ഓസ്ട്രേലിയയിലെ ഏറ്റവും വലിയ ആകാശചുംബിയായി മാറുമെന്ന് എറിക് ട്രംപ് അവകാശപ്പെട്ടു. രാജ്യത്തെ ആദ്യത്തെ ‘ട്രംപ് ഹോട്ടൽ’ എന്ന പ്രത്യേകതയും ഇതിനുണ്ടാകും. 285 ലക്ഷ്വറി ഹോട്ടൽ മുറികൾക്കും 272 ആഡംബര അപ്പാർട്ടുമെന്റുകൾക്കും പുറമെ ഒരു എക്സ്ക്ലൂസീവ് ബീച്ച് ക്ലബ്ബും ഈ ടവറിൽ സജ്ജീകരിക്കും.
എന്നാൽ, പദ്ധതി പ്രഖ്യാപിച്ചതിന് പിന്നാലെ പ്രദേശവാസികളിൽ നിന്നും കടുത്ത പ്രതിഷേധം ഉയരുന്നുണ്ട്. ട്രംപ് എന്ന ബ്രാൻഡിനോടുള്ള വിയോജിപ്പും പരിസ്ഥിതി ആഘാതവും ചൂണ്ടിക്കാട്ടി ‘change.org’-ൽ ആരംഭിച്ച നിവേദനത്തിൽ ഇതിനോടകം 50,000-ത്തിലധികം പേർ ഒപ്പിട്ടു കഴിഞ്ഞു. അമിതമായ നഗരവൽക്കരണവും പ്രാദേശിക അടിസ്ഥാന സൗകര്യങ്ങൾക്കുമേൽ ഉണ്ടായേക്കാവുന്ന സമ്മർദ്ദവും പ്രതിഷേധക്കാർ പ്രധാനമായും ഉയർത്തുന്നു. അതേസമയം, പദ്ധതിയെ അനുകൂലിക്കുന്ന മൂവായിരത്തോളം പേർ മറ്റൊരു നിവേദനവുമായും രംഗത്തുണ്ട്.
ഗോൾഡ് കോസ്റ്റ് കൗൺസിലിന്റെയും സംസ്ഥാന സർക്കാരിന്റെയും അന്തിമ അനുമതിക്കായി ആൾട്ടസ് പ്രോപ്പർട്ടി ഗ്രൂപ്പ് (Altus Property Group) അപേക്ഷ നൽകാനിരിക്കുകയാണ്. 2026 ഓഗസ്റ്റിൽ നിർമ്മാണം ആരംഭിച്ച് 2032-ലെ ബ്രിസ്ബേൻ ഒളിമ്പിക്സിന് മുൻപായി പദ്ധതി പൂർത്തിയാക്കാനാണ് ലക്ഷ്യമിടുന്നത്.
