മുംബൈ: വാങ്കഡെ സ്റ്റേഡിയത്തിൽ നടന്ന ആവേശം നിറഞ്ഞ ടി20 ലോകകപ്പ് രണ്ടാം സെമി ഫൈനലിൽ ഇംഗ്ലണ്ടിനെ 7 റൺസിന് പരാജയപ്പെടുത്തി ഇന്ത്യ ഫൈനലിൽ പ്രവേശിച്ചു. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 253 റൺസെന്ന കൂറ്റൻ സ്കോറാണ് പടുത്തുയർത്തിയത്. മറുപടി ബാറ്റിംഗിനിറങ്ങിയ ഇംഗ്ലണ്ടിന് 20 ഓവറിൽ 7 വിക്കറ്റ് നഷ്ടത്തിൽ 246 റൺസെടുക്കാനേ സാധിച്ചുള്ളൂ.
ഇന്ത്യൻ നിരയിൽ മലയാളി താരം സഞ്ജു സാംസൺ ഒരിക്കൽ കൂടി മിന്നുന്ന പ്രകടനം കാഴ്ചവെച്ചു. വെറും 42 പന്തിൽ നിന്ന് 7 സിക്സറുകളും 8 ഫോറുകളുമടക്കം 89 റൺസാണ് സഞ്ജു അടിച്ചുകൂട്ടിയത്. ഇഷാൻ കിഷൻ (39), ശിവം ദുബെ (43) എന്നിവരും മികച്ച പിന്തുണ നൽകി. അവസാന ഓവറുകളിൽ ഹാർദിക് പാണ്ഡ്യയുടെയും തിലക് വർമ്മയുടെയും വെടിക്കെട്ട് ബാറ്റിംഗാണ് ഇന്ത്യൻ സ്കോർ 250 കടത്തിയത്.
ഇംഗ്ലണ്ടിനായി ജേക്കബ് ബെഥേൽ (105) സെഞ്ച്വറിയുമായി പൊരുതിയെങ്കിലും ഇന്ത്യൻ ബൗളർമാരുടെ കൃത്യതയാർന്ന പ്രകടനം വിജയമുറപ്പിച്ചു. ജസ്പ്രീത് ബുംറ തന്റെ സ്പെല്ലിലെ ആദ്യ പന്തിൽ തന്നെ ഹാരി ബ്രൂക്കിനെ പുറത്താക്കി അന്താരാഷ്ട്ര ക്രിക്കറ്റിൽ 500 വിക്കറ്റുകൾ എന്ന ചരിത്ര നേട്ടം കൈവരിച്ചു. അക്സർ പട്ടേലിന്റെ തകർപ്പൻ ക്യാച്ചുകളും മത്സരത്തിൽ നിർണ്ണായകമായി.
