മെൽബൺ: ഫോർമുല വൺ 2026 സീസണിലെ ആദ്യ മത്സരമായ ഓസ്ട്രേലിയൻ ഗ്രാൻഡ് പ്രീയിൽ മെഴ്സിഡസിന്റെ ജോർജ്ജ് റസ്സലിന് ഉജ്ജ്വല വിജയം. ആവേശകരമായ പോരാട്ടത്തിനൊടുവിൽ ഫെരാരിയുടെ വെല്ലുവിളികളെ മറികടന്നാണ് റസ്സൽ സീസണിലെ ആദ്യ കിരീടം സ്വന്തമാക്കിയത്. റസ്സലിന് പിന്നാലെ സഹതാരം കിമി ആന്റനെല്ലി രണ്ടാം സ്ഥാനത്തെത്തിയതോടെ മെഴ്സിഡസ് സീസൺ തുടങ്ങിയത് ഇരട്ട നേട്ടത്തോടെയാണ്.
പുതിയ സാങ്കേതിക നിയമങ്ങൾ നിലവിൽ വന്ന ശേഷമുള്ള ആദ്യ മത്സരത്തിൽ മെഴ്സിഡസും ഫെരാരിയും തമ്മിലുള്ള ഇഞ്ചോടിഞ്ച് പോരാട്ടമാണ് മെൽബണിലെ ആൽബർട്ട് പാർക്ക് സർക്യൂട്ടിൽ കണ്ടത്. പ്രാദേശിക ഹീറോ ഓസ്കാർ പിസ്ട്രി ഉൾപ്പെടെയുള്ള താരങ്ങൾ സാങ്കേതിക തകരാറുകൾ മൂലം മത്സരം പൂർത്തിയാക്കാനാകാതെ പുറത്തായത് ആരാധകർക്ക് നിരാശയായി.
മത്സരത്തിന്റെ ഭൂരിഭാഗം സമയവും റസ്സലും ഫെരാരിയുടെ ചാൾസ് ലെക്ലെയറും തമ്മിലായിരുന്നു പ്രധാന പോരാട്ടം. ഓരോ ലാപ്പിലും ഇരുവരും പലതവണ പരസ്പരം മറികടന്ന് മുന്നിലെത്തി. “ഒരാൾ മുന്നിലെത്തിയാൽ ആ സ്ഥാനം നിലനിർത്തുക എന്നത് അസാധ്യമായിരുന്നു,” എന്ന് മത്സരശേഷം റസ്സൽ പ്രതികരിച്ചു. പുതിയ പവർ യൂണിറ്റുകളിലെ ‘സ്ട്രെയിറ്റ് മോഡ്’ കാറിന്റെ ബാലൻസിനെ ബാധിക്കുന്നതായും അദ്ദേഹം ചൂണ്ടിക്കാട്ടി. ലെക്ലെയറിന്റെ പ്രതിരോധ നീക്കങ്ങൾ അപകടകരമാണെന്ന് റസ്സൽ റേഡിയോയിലൂടെ ടീമിനെ അറിയിച്ചതും മത്സരത്തിനിടെ ശ്രദ്ധേയമായി.
ഫെരാരി താരങ്ങളായ ലൂയിസ് ഹാമിൽട്ടണും ചാൾസ് ലെക്ലെയറും മികച്ച തുടക്കമാണ് നൽകിയതെങ്കിലും മെഴ്സിഡസിന്റെ തന്ത്രങ്ങൾക്കും വേഗതയ്ക്കും മുന്നിൽ അവർക്ക് മൂന്നും നാലും സ്ഥാനങ്ങൾ കൊണ്ട് തൃപ്തിപ്പെടേണ്ടി വന്നു. 2019-ന് ശേഷം ആദ്യമായാണ് മെഴ്സിഡസ് താരങ്ങൾ പോഡിയത്തിൽ ആദ്യ രണ്ട് സ്ഥാനങ്ങൾ പങ്കിടുന്നത്.
