സിഡ്നി: എൻആർഎൽ ചരിത്രത്തിലെ ഏറ്റവും വലിയ ട്രൈ സ്കോറർ എന്ന റെക്കോർഡ് സ്വന്തമാക്കി സൗത്ത് സിഡ്നി റാബിറ്റോസിന്റെ വിംഗർ അലക്സ് ജോൺസ്റ്റൺ. സിഡ്നി റൂസ്റ്റേഴ്സിനെതിരായ മത്സരത്തിൽ തന്റെ കരിയറിലെ 213-ാമത്തെ ട്രൈ നേടിയതോടെ, കഴിഞ്ഞ 53 വർഷമായി കെൻ ഇർവിൻ കൈവശം വച്ചിരുന്ന റെക്കോർഡാണ് തകർന്നത്. അലയൻസ് സ്റ്റേഡിയത്തിൽ നടന്ന ആവേശകരമായ മത്സരത്തിനിടയിലായിരുന്നു ഈ ചരിത്ര നിമിഷം.
ജോൺസ്റ്റൺ റെക്കോർഡ് കുറിച്ചതിന് പിന്നാലെ ആയിരക്കണക്കിന് ആരാധകരാണ് സുരക്ഷാ വേലികൾ ഭേദിച്ച് മൈതാനത്തേക്ക് ഇരച്ചെത്തിയത്. ഇതോടെ മത്സരം 15 മിനിറ്റോളം തടസ്സപ്പെട്ടു. ആരാധകരുടെ ഈ ആവേശത്തിനിടയിൽ സർപ്രൈസായി ഓസ്ട്രേലിയൻ പ്രധാനമന്ത്രി ആന്തണി ആൽബനീസും മൈതാനത്തെത്തിയത് ഏവരെയും അമ്പരപ്പിച്ചു. റാബിറ്റോസിന്റെ ചുവപ്പും പച്ചയും കലർന്ന സ്കാർഫ് ധരിച്ചാണ് അദ്ദേഹം എത്തിയത്. ക്ലബ്ബിന്റെ ദീർഘകാല ആരാധകനും മുൻ ഡയറക്ടറുമായ ആൽബനീസ്, തന്റെ ടീമിന്റെയും ജോൺസ്റ്റന്റെയും ഈ വലിയ നേട്ടം ആഘോഷിക്കാൻ പ്രോട്ടോക്കോളുകൾ മാറ്റിവെച്ച് ജനങ്ങൾക്കിടയിലേക്ക് ഇറങ്ങുകയായിരുന്നു.
മൈതാനത്തേക്ക് അതിക്രമിച്ചു കയറിയതിന് പിഴ ലഭിക്കുമോ എന്ന ഇതിഹാസ താരം ബില്ലി സ്ലേറ്ററുടെ ചോദ്യത്തിന്, “ചരിത്രത്തിന്റെ ഭാഗമാകാൻ കഴിഞ്ഞതിൽ ആ പിഴയൊക്കെ നിസ്സാരമാണ്” എന്നായിരുന്നു പ്രധാനമന്ത്രിയുടെ മറുപടി. അലക്സ് ജോൺസ്റ്റൺ ഒരു മികച്ച കളിക്കാരൻ മാത്രമല്ല, വിനീതനായ ഒരു മനുഷ്യനും നല്ലൊരു എഴുത്തുകാരനുമാണെന്നും അദ്ദേഹം കൂട്ടിച്ചേർത്തു. റാബിറ്റോസ് കടുത്ത പ്രതിസന്ധി നേരിട്ടിരുന്ന കാലത്ത് ക്ലബ്ബിന്റെ ബോർഡ് മെമ്പറായിരുന്ന ആൽബനീസിന് ഈ വിജയത്തിന് വലിയ വ്യക്തിപരമായ പ്രാധാന്യമുണ്ട്.
എങ്കിലും, ജോൺസ്റ്റന്റെ വ്യക്തിഗത നേട്ടം റാബിറ്റോസിന് ടീം വിജയം നേടിക്കൊടുത്തില്ല. ആവേശകരമായ പോരാട്ടത്തിനൊടുവിൽ സിഡ്നി റൂസ്റ്റേഴ്സ് 26-18 എന്ന സ്കോറിന് വിജയിച്ചു
