കാൻബറ: ഓസ്ട്രേലിയയിൽ ഇന്ധനക്ഷാമം അതിരൂക്ഷമായ സാഹചര്യത്തിൽ പരിഹാരമാർഗങ്ങൾ ചർച്ച ചെയ്യുന്നതിനായി പ്രധാനമന്ത്രി ആന്തണി ആൽബനീസി ഇന്ന് അടിയന്തര ദേശീയ ക്യാബിനറ്റ് യോഗം വിളിച്ചു. സംസ്ഥാനങ്ങളിലെയും ടെറിട്ടറികളിലെയും ഭരണത്തലവന്മാർ യോഗത്തിൽ പങ്കെടുക്കും. പശ്ചിമേഷ്യയിലെ യുദ്ധത്തെത്തുടർന്ന് ഇറാനുനേരെ അമേരിക്കയുടെ നേതൃത്വത്തിൽ നടന്ന ആക്രമണങ്ങളാണ് ആഗോളതലത്തിൽ എണ്ണപ്രതിസന്ധിക്ക് കാരണമായത്.
രാജ്യത്ത് പെട്രോൾ, ഡീസൽ ശേഖരം വേഗത്തിൽ തീർന്നുകൊണ്ടിരിക്കുകയാണ്. ഒരു മാസത്തേക്കുള്ള കരുതൽ ശേഖരം ഉണ്ടെന്ന് സർക്കാർ ഉറപ്പുനൽകുന്നുണ്ടെങ്കിലും വിപണിയിൽ സ്ഥിതി സങ്കീർണ്ണമാണ്. നിലവിൽ പെട്രോൾ ലിറ്ററിന് 2.60 ഡോളറിന് മുകളിലും ഡീസൽ 3 ഡോളറിന് മുകളിലുമാണ് വില. പ്രതിസന്ധി മറികടക്കാൻ ഇന്ധന വിതരണത്തിൽ നിയന്ത്രണം ഏർപ്പെടുത്തുന്നതിനൊപ്പം, സൗജന്യ പൊതുഗതാഗതം, വീട്ടിലിരുന്ന് ജോലി ചെയ്യാനുള്ള സൗകര്യം (Work from Home) തുടങ്ങിയ നിർദ്ദേശങ്ങളും ക്യാബിനറ്റ് പരിഗണിക്കുന്നുണ്ട്.
രാജ്യത്തുടനീളം ഏകോപിതവും കൃത്യവുമായ ഇടപെടൽ ആവശ്യമാണെന്ന് ട്രഷറർ ജിം ചാൽമേഴ്സ് പറഞ്ഞു. കോവിഡ് കാലത്തെപ്പോലെയുള്ള കടുത്ത നിയന്ത്രണങ്ങൾ ഒഴിവാക്കാൻ ഇപ്പോഴത്തെ മുൻകരുതൽ നടപടികൾ സഹായിക്കുമെന്നും അദ്ദേഹം വ്യക്തമാക്കി. എന്നാൽ ഇന്ധന ഉപയോഗത്തിൽ നിയന്ത്രണങ്ങൾ നിർബന്ധമാക്കാൻ താൽപ്പര്യമില്ലെന്നും ജനങ്ങൾ വിവേകത്തോടെ പെരുമാറണമെന്നുമാണ് പ്രധാനമന്ത്രിയുടെ നിലപാട്. ഇന്ധനം അനാവശ്യമായി ശേഖരിച്ചുവെക്കുന്നത് മറ്റുള്ളവർക്ക് ബുദ്ധിമുട്ടുണ്ടാക്കുമെന്നുമാത്രമല്ല അത് അപകടകരവുമാണെന്ന് അദ്ദേഹം ഓർമ്മിപ്പിച്ചു.
പ്രതിസന്ധി പരിഹരിക്കാൻ ഓസ്ട്രേലിയൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി (ACCI) നാല് നിർദ്ദേശങ്ങൾ സർക്കാരിന് മുന്നിൽ വെച്ചിട്ടുണ്ട്. ഗൾഫ് രാജ്യങ്ങളുമായുള്ള സഹകരണം ശക്തമാക്കി ഇന്ധനലഭ്യത ഉറപ്പാക്കുക, വിതരണക്കാരുമായി ചേർന്ന് ഇന്ധനം വേഗത്തിൽ ജനങ്ങളിലേക്ക് എത്തിക്കുക, ഗതാഗത മേഖലയിലെ ഭാരം കുറയ്ക്കാൻ റോഡ് യൂസർ ടാക്സ് 32.4 സെന്റിൽ നിന്നും കുറയ്ക്കുക എന്നിവയാണ് പ്രധാന ആവശ്യങ്ങൾ.
അതേസമയം, വിതരണക്കാർക്ക് ഇന്ധനം വാങ്ങുന്നതിനായി സർക്കാർ ഫണ്ട് ഉപയോഗിക്കാൻ അനുമതി നൽകുന്ന പുതിയ നിയമം ഊർജ്ജമന്ത്രി ക്രിസ് ബോവൻ ഇന്ന് പാർലമെന്റിൽ അവതരിപ്പിക്കും. ഓസ്ട്രേലിയയുടെ ചലനാത്മകത നിലനിർത്താൻ അന്താരാഷ്ട്ര വിതരണക്കാരുമായി ചേർന്ന് കൂടുതൽ ഇന്ധന കപ്പലുകൾ എത്തിക്കാനുള്ള ശ്രമങ്ങളും സർക്കാർ തുടരുകയാണ്.
