കൊച്ചി: നടിയെ ആക്രമിച്ച കേസിൽ ശിക്ഷിക്കപ്പെട്ട പ്രതികൾ സമർപ്പിച്ച ശിക്ഷാവിധി മരവിപ്പിക്കണമെന്ന ഹർജികൾ കേരള ഹൈക്കോടതി തള്ളി. ഒന്നാം പ്രതി പൾസർ സുനി ഉൾപ്പെടെ ആറു പ്രതികളാണ് അപ്പീൽ പരിഗണനയിലിരിക്കെ 20 വർഷത്തെ തടവുശിക്ഷ മരവിപ്പിക്കണമെന്ന് ആവശ്യപ്പെട്ട് കോടതിയെ സമീപിച്ചത്.
പ്രതികൾ ഉന്നയിച്ച വാദങ്ങൾ പരിഗണിച്ച കോടതി, കേസിന്റെ ഗൗരവം, വിചാരണക്കോടതി കണ്ടെത്തിയ തെളിവുകൾ, കുറ്റകൃത്യത്തിന്റെ സ്വഭാവം എന്നിവ കണക്കിലെടുത്താണ് ശിക്ഷ മരവിപ്പിക്കണമെന്ന ആവശ്യം നിരസിച്ചത്.
എറണാകുളം പ്രിൻസിപ്പൽ സെഷൻസ് കോടതി 2025 ഡിസംബറിൽ പൾസർ സുനി ഉൾപ്പെടെ ആറു പ്രതികൾക്ക് 20 വർഷം കഠിന തടവും മറ്റ് ശിക്ഷകളും വിധിച്ചിരുന്നു. അതേസമയം, കേസിൽ പ്രതിയായിരുന്ന നടൻ ദിലീപിനെയും മറ്റ് മൂന്ന് പ്രതികളെയും വിചാരണക്കോടതി വെറുതെവിട്ടിരുന്നു. ഈ വെറുതെവിടൽ ചോദ്യം ചെയ്ത് സംസ്ഥാന സർക്കാർ ഹൈക്കോടതിയിൽ അപ്പീൽ നൽകിയിട്ടുണ്ട്.
