കാൻബറ: ഓസ്ട്രേലിയയുടെ പ്രകൃതിവാതക കയറ്റുമതി നിയമങ്ങളിൽ മാറ്റം വരുത്തണമെന്നാവശ്യം ശക്തമാകുന്നു. ഗ്യാസ് കയറ്റുമതിക്ക് 25 ശതമാനം നികുതി ഏർപ്പെടുത്തിയാൽ ഖജനാവിലേക്ക് ആഴ്ചയിൽ ഏകദേശം 350 ദശലക്ഷം ഡോളർ അധികമായി ലഭിക്കുമെന്ന് ‘ദി ഓസ്ട്രേലിയ ഇൻസ്റ്റിറ്റ്യൂട്ട്’ പുറത്തുവിട്ട പുതിയ പഠന റിപ്പോർട്ടിൽ പറയുന്നു.
നിലവിലെ പെട്രോളിയം റിസോഴ്സ് റെന്റ് ടാക്സ് പരാജയമാണെന്നും പുതിയ നികുതി നടപ്പിലാക്കാൻ വൈകുന്നത് ഓസ്ട്രേലിയൻ ജനതയ്ക്ക് വൻ സാമ്പത്തിക നഷ്ടമുണ്ടാക്കുന്നുവെന്നും ഇൻസ്റ്റിറ്റ്യൂട്ട് കോ-ചീഫ് എക്സിക്യൂട്ടീവ് ഡോ. റിച്ചാർഡ് ഡെനിസ് പറഞ്ഞു. 2022 ജൂലൈയിൽ ഈ നികുതി നടപ്പിലാക്കിയിരുന്നെങ്കിൽ ഇതുവരെ 68 ബില്യൺ ഡോളർ സമാഹരിക്കാമായിരുന്നുവെന്ന് റിപ്പോർട്ട് ചൂണ്ടിക്കാട്ടുന്നു. സ്കൂളുകളുടെയും ആശുപത്രികളുടെയും പ്രവർത്തനത്തിന് ഈ തുക വിനിയോഗിക്കാൻ സാധിക്കും. വൺ നേഷൻ മുതൽ ഗ്രീൻസ് വരെയുള്ള വിവിധ രാഷ്ട്രീയ പാർട്ടികളിലെ വോട്ടർമാരും ഈ നികുതി പരിഷ്കാരത്തെ പിന്തുണയ്ക്കുന്നതായാണ് സൂചന.
അമേരിക്ക-ഇറാൻ സംഘർഷത്തെത്തുടർന്ന് ഹോർമുസ് കടലിടുക്ക് അടച്ചതോടെ ആഗോളതലത്തിൽ ഉണ്ടായ ഇന്ധന പ്രതിസന്ധി കണക്കിലെടുത്ത്, ആഭ്യന്തരമായി കൂടുതൽ വാതക ശേഖരം (Gas Reserve) ഉണ്ടാക്കുന്നത് ഓസ്ട്രേലിയയുടെ കരുത്ത് വർദ്ധിപ്പിക്കുമെന്ന് വിദഗ്ധർ അഭിപ്രായപ്പെടുന്നു. സൗരോർജ്ജം, കാറ്റാടി മിൽ തുടങ്ങിയ പുനരുപയോഗ ഊർജ്ജ സ്രോതസ്സുകളിലേക്ക് മാറുന്നതാണ് ഏറ്റവും ഉചിതമെന്ന് ന്യൂ സൗത്ത് വെയ്ൽസ് സർവകലാശാലയിലെ ഇക്കണോമിക്സ് ലക്ചറർ ഡോ. സ്കോട്ട് ഫ്രഞ്ച് പറഞ്ഞു.
എന്നാൽ, പുതിയ നികുതി നിർദ്ദേശത്തിനെതിരെ പ്രമുഖ ഊർജ്ജ കമ്പനികൾ രംഗത്തെത്തിയിട്ടുണ്ട്. അധിക നികുതി ഏർപ്പെടുത്തുന്നത് ചെറുകിട കമ്പനികളെ വിപണിയിൽ നിന്ന് പുറത്താക്കുമെന്നും വിദേശ നിക്ഷേപകർ പിൻവാങ്ങാൻ കാരണമാകുമെന്നും ഷെവ്റോൺ (Chevron) എക്സിക്യൂട്ടീവ് ഡാനി വുഡാൽ മുന്നറിയിപ്പ് നൽകി. കൂടാതെ, ക്വീൻസ്ലാന്റിലെ കയറ്റുമതിക്കാർ തങ്ങളുടെ ഉൽപാദനത്തിന്റെ 25 ശതമാനം ആഭ്യന്തര വിപണിയിൽ നൽകണമെന്ന സർക്കാർ നിർദ്ദേശം വിപണിയുടെ സന്തുലിതാവസ്ഥ തകർക്കുമെന്ന് ബീച്ച് എനർജി (Beach Energy) ചീഫ് എക്സിക്യൂട്ടീവ് ബ്രെറ്റ് വുഡ്സും അഭിപ്രായപ്പെട്ടു. ഇതിനെ തത്വത്തിൽ പിന്തുണയ്ക്കുന്നുണ്ടെങ്കിലും നടപ്പിലാക്കുന്ന രീതിയിൽ പിഴവുകളുണ്ടെന്ന് അദ്ദേഹം ചൂണ്ടിക്കാട്ടി.
