അഡ്ലെയ്ഡ്: സൗത്ത് ഓസ്ട്രേലിയൻ പോലീസ് സേനയുടെ (SAPOL) സ്ഥാപക ദിനം ഇന്ന് രാജ്യമൊട്ടാകെ ആഘോഷിക്കുന്നു. 1838 ഏപ്രിൽ 28-ന് ഒരു പോലീസ് ഇൻസ്പെക്ടറും പത്ത് വീതം മൗണ്ടഡ്, ഫൂട്ട് കോൺസ്റ്റബിൾമാരും സത്യപ്രതിജ്ഞ ചെയ്ത് ചുമതലയേറ്റതിന്റെ ഓർമ്മ പുതുക്കിയാണ് ഈ ദിനം ആചരിക്കുന്നത്. 1992 മുതലാണ് ഔദ്യോഗികമായി ഈ ദിനം സ്ഥാപക ദിനമായി ആഘോഷിച്ചു തുടങ്ങിയത്.
ഓരോ വർഷവും ചരിത്രപ്രധാനമായ ഓരോ പ്രമേയങ്ങളിലൂന്നിയാണ് സ്ഥാപക ദിനം ആചരിക്കാറുള്ളത്. 2026-ലെ ഈ ദിനത്തിൽ, 1884-ൽ ഔദ്യോഗിക കൃത്യനിർവ്വഹണത്തിനിടെ ജീവൻ വെടിഞ്ഞ മൗണ്ടഡ് കോൺസ്റ്റബിൾ റിച്ചാർഡ് വില്യം സ്പൈസറുടെ സ്മരണയ്ക്കാണ് സേന മുൻഗണന നൽകുന്നത്. 34-ാം വയസ്സിൽ ഫരീനയ്ക്ക് സമീപം നടന്ന പരിശീലനത്തിനിടെ ഗുരുതരമായി പരിക്കേറ്റ സ്പൈസർ തൊട്ടടുത്ത ദിവസം പോർട്ട് അഗസ്റ്റയിൽ വെച്ചാണ് മരണമടഞ്ഞത്. അത്യന്തം സമർപ്പണബോധമുള്ള ഉദ്യോഗസ്ഥനായിരുന്നു അദ്ദേഹം എന്ന് ചരിത്രരേഖകൾ വ്യക്തമാക്കുന്നു.
സ്ഥാപക ദിനാഘോഷങ്ങളുടെ ഭാഗമായി റിച്ചാർഡ് സ്പൈസറുടെ സ്മരണാർത്ഥം 2026 മെയ് 29-ന് ഫരീന പോലീസ് സ്റ്റേഷനിൽ പ്രത്യേക അനുസ്മരണ ചടങ്ങ് സംഘടിപ്പിക്കും. അദ്ദേഹത്തിന്റെ സേവനങ്ങളെയും ജീവിതത്തെയും ആദരിച്ചുകൊണ്ട് നിർമ്മിച്ച സ്മാരക ഫലകം ചടങ്ങിൽ അനാവരണം ചെയ്യും.
സൗത്ത് ഓസ്ട്രേലിയൻ പോലീസിന്റെ ചരിത്രത്തിലെ നിർണ്ണായക നാഴികക്കല്ലുകളും ധീരരായ ഉദ്യോഗസ്ഥരെയും പുതിയ തലമുറയ്ക്ക് പരിചയപ്പെടുത്തുന്നതിനും ആദരിക്കുന്നതിനും ഇത്തരം ആഘോഷങ്ങൾ സഹായകരമാണെന്ന് അധികൃതർ വ്യക്തമാക്കി. 188 വർഷത്തെ സേവന പാരമ്പര്യമുള്ള എസ്.എ.പി.ഒ.എൽ, ഓസ്ട്രേലിയയിലെ തന്നെ ഏറ്റവും പഴക്കമേറിയ പോലീസ് സേനകളിലൊന്നാണ്.
