വാഷിംഗ്ടൺ: ഇറാനുമായുള്ള സംഘർഷത്തിന്റെ പശ്ചാത്തലത്തിൽ ആണവനയത്തിൽ കടുത്ത നിലപാട് ആവർത്തിച്ച് യുഎസ് പ്രസിഡന്റ് ഡൊണാൾഡ് ട്രംപ്. ഇറാൻ ആണവായുധം വികസിപ്പിക്കുന്നത് അനുവദിക്കില്ലെന്നും അതിനായി ആവശ്യമായ ഏത് നടപടിയും സ്വീകരിക്കുമെന്നും ട്രംപ് വ്യക്തമാക്കി.യുദ്ധം അവസാനിപ്പിച്ചതായി കോൺഗ്രസിനെ അറിയിച്ച സാഹചര്യത്തിലും ഇറാന്റെ ആണവപരിപാടി യുഎസിന്റെ പ്രധാന ആശങ്കയായിത്തന്നെ തുടരുകയാണെന്ന് അദ്ദേഹം പറഞ്ഞു. ആണവായുധങ്ങൾ “അപകടകാരികളായ ഭരണകൂടങ്ങളുടെ കൈവശമാകുന്നത് അനുവദിക്കാനാവില്ല” എന്നതാണ് അമേരിക്കയുടെ നിലപാടെന്ന് ട്രംപ് വിശദീകരിച്ചു.
ഇറാനെതിരായ സൈനിക നടപടികളും സാമ്പത്തിക സമ്മർദ്ദവും ഉൾപ്പെടുന്ന തന്ത്രം തുടരുകയാണെന്നും, ഇറാൻ ആണവപരിപാടി പൂർണമായി അവസാനിപ്പിക്കുന്നതുവരെ സമ്മർദ്ദം കുറയില്ലെന്നും അദ്ദേഹം സൂചിപ്പിച്ചു.
അതേസമയം, ഇറാൻ ആണവപരിപാടി ഉപേക്ഷിക്കണമെന്ന് ആവശ്യപ്പെട്ടുകൊണ്ട് യുഎസ് കർശന നിബന്ധനകൾ മുന്നോട്ടുവച്ചിരിക്കുമ്പോൾ, ഇറാൻ ഈ വിഷയത്തിൽ ഇളവ് കാണിക്കാത്തതാണ് പ്രധാന തർക്കകാരണമെന്ന് റിപ്പോർട്ടുകൾ പറയുന്നു.
സംഘർഷം ഔദ്യോഗികമായി അവസാനിച്ചതായി പ്രഖ്യാപിച്ചിട്ടുണ്ടെങ്കിലും, ആണവപ്രശ്നത്തെ ചുറ്റിപ്പറ്റിയുള്ള അമേരിക്ക–ഇറാൻ ഭിന്നത തുടരുന്നതിനാൽ മേഖലയിലെ അനിശ്ചിതത്വം തുടരുന്നതായാണ് വിലയിരുത്തൽ.
