തൊടുപുഴ: കായിക താരങ്ങൾക്കിടയിൽ ആരോഗ്യ അവബോധം വളർത്തുക എന്ന ലക്ഷ്യത്തോടെ തൊടുപുഴ ജില്ലാ ആയുർവേദ ആശുപത്രി സ്പോർട്സ് ആയുർവേദ വിഭാഗവും തൊടുപുഴ സോക്കർ സ്കൂളും സംയുക്തമായി ബോധവൽക്കരണ ക്ലാസും സമ്മർ മെഡിക്കൽ ക്യാമ്പും സംഘടിപ്പിച്ചു. 2026 മെയ് 2-ന് ജില്ലാ ആയുർവേദ ആശുപത്രിയിൽ വെച്ചായിരുന്നു പരിപാടി നടന്നത്. സോക്കർ സ്കൂളിന്റെ സമ്മർ ക്യാമ്പിൽ പരിശീലനം തേടുന്ന നൂറുകണക്കിന് കായിക താരങ്ങൾ പരിപാടിയിൽ പങ്കെടുത്തു.
മുൻ സന്തോഷ് ട്രോഫി താരം പി.എ. സലിംകുട്ടി പരിപാടിയിൽ മുഖ്യാതിഥിയായി സംബന്ധിച്ചു. കായിക രംഗത്തെ അച്ചടക്കവും ശാരീരികക്ഷമതയും നിലനിർത്തേണ്ടതിന്റെ ആവശ്യകത അദ്ദേഹം താരങ്ങളുമായി പങ്കുവെച്ചു. ജില്ലാ ആയുർവേദ ആശുപത്രി സൂപ്രണ്ട് ഡോ. മഞ്ജു ജോസഫ് ചടങ്ങിൽ അധ്യക്ഷത വഹിച്ചു. ചീഫ് മെഡിക്കൽ ഓഫീസർ ഡോ. ഷീജ യു.ബി. സ്വാഗതം ആശംസിച്ചു.
തുടർന്ന് കായിക താരങ്ങൾക്കായി പ്രത്യേക സെഷനുകൾ നടന്നു. “കായികപരമായ പരിക്കുകൾ പ്രതിരോധിക്കുന്നതിനും പരിഹരിക്കുന്നതിനും സ്പോർട്സ് ആയുർവേദ” എന്ന വിഷയത്തിൽ മെഡിക്കൽ ഓഫീസർ ഡോ. അരുൺ രാജേന്ദ്രനും, “സ്പോർട്സ് ന്യൂട്രീഷൻ” എന്ന വിഷയത്തിൽ ഡോ. അനുപ്രിയ പി. മണിയും ക്ലാസുകൾ നയിച്ചു. കായിക വിനോദങ്ങളിൽ ഏർപ്പെടുമ്പോൾ ഉണ്ടാകാൻ സാധ്യതയുള്ള ശാരീരിക ബുദ്ധിമുട്ടുകളെ ശാസ്ത്രീയമായി എങ്ങനെ നേരിടാമെന്നും മികച്ച പ്രകടനത്തിന് പോഷകാഹാരം എത്രത്തോളം പ്രധാനമാണെന്നും ക്ലാസിൽ വിശദീകരിച്ചു.
ലേ സെക്രട്ടറി ഗോപി കെ.ആർ. ചടങ്ങിൽ ആശംസകൾ അർപ്പിച്ചു. സ്പോർട്സ് ആയുർവേദ വിഭാഗം ഫിസിയോതെറാപ്പിസ്റ്റ് അർജുൻ പി.വി. നന്ദി രേഖപ്പെടുത്തി. കായിക താരങ്ങളുടെ ആരോഗ്യ സംരക്ഷണത്തിനായി ആയുർവേദ ചികിത്സാ രീതികൾ പ്രയോജനപ്പെടുത്തുന്നതിന്റെ ഭാഗമായാണ് ഇത്തരം ക്യാമ്പുകൾ സംഘടിപ്പിക്കുന്നത്.
