ലണ്ടൻ: ബ്രിട്ടനിൽ ലോറികൾ, ബസുകൾ, കോച്ചുകൾ എന്നിവ പ്രൊഫഷണൽ ആവശ്യങ്ങൾക്കായി ഓടിക്കുന്ന ഡ്രൈവർമാർ തങ്ങളുടെ ഡ്രൈവർ സർട്ടിഫിക്കറ്റ് ഓഫ് പ്രൊഫഷണൽ കോംപറ്റൻസ് (CPC) യഥാസമയം പുതുക്കണമെന്ന് അധികൃതർ കർശന നിർദേശം നൽകി. നിയമം ലംഘിക്കുന്ന ഡ്രൈവർമാർക്കും അവർ ജോലി ചെയ്യുന്ന സ്ഥാപനങ്ങൾക്കും 1,000 പൗണ്ട് (ഏകദേശം ഒരു ലക്ഷത്തിലധികം രൂപ) വരെ പിഴ ചുമത്തുമെന്ന് GOV.UK മുന്നറിയിപ്പ് നൽകി.
പ്രൊഫഷണൽ ഡ്രൈവിംഗ് ലൈസൻസ് നിലനിർത്തുന്നതിന് ഓരോ അഞ്ച് വർഷത്തിലും 35 മണിക്കൂർ നിർബന്ധിത പരിശീലനം പൂർത്തിയാക്കിയിരിക്കണം. ഈ പരിശീലനം പൂർത്തിയാക്കാത്തവർക്ക് പിന്നീട് പ്രൊഫഷണലായി വാഹനം ഓടിക്കുന്നത് നിയമവിരുദ്ധമാകും. നിശ്ചിത സമയപരിധിക്കുള്ളിൽ പരിശീലനം പൂർത്തിയാക്കാത്തവർ, അത് പൂർത്തിയാക്കുന്നത് വരെ ജോലിയിൽ നിന്ന് വിട്ടുനിൽക്കേണ്ടി വരും.
ഡ്രൈവർമാർ തങ്ങളുടെ ഡിജിറ്റൽ കാർഡിലെ കാലാവധി കൃത്യമായി പരിശോധിക്കണമെന്നും അവസാന നിമിഷം വരെ കാത്തുനിൽക്കാതെ പരിശീലനം പൂർത്തിയാക്കണമെന്നും ഈ രംഗത്തെ വിദഗ്ധർ നിർദേശിക്കുന്നു. പരിശീലനം മുടങ്ങിയാൽ പിഴയ്ക്ക് പുറമെ ലൈസൻസ് സസ്പെൻഡ് ചെയ്യുന്നതുൾപ്പെടെയുള്ള കർശന നടപടികൾ നേരിടേണ്ടി വരുമെന്നും റിപ്പോർട്ടുകൾ വ്യക്തമാക്കുന്നു.
