ചെന്നൈ: തമിഴ്നാട് നിയമസഭാ തിരഞ്ഞെടുപ്പിന്റെ വോട്ടെണ്ണൽ പുരോഗമിക്കുമ്പോൾ രാഷ്ട്രീയ കേന്ദ്രങ്ങളെ ഞെട്ടിച്ചുകൊണ്ട് വിജയിന്റെ നേതൃത്വത്തിലുള്ള തമിഴക വെട്രി കഴകം (TVK) വൻ മുന്നേറ്റം നടത്തുന്നു. ഭരണകക്ഷിയായ ഡി.എം.കെ നേതൃത്വം നൽകുന്ന സഖ്യത്തിന് പല മണ്ഡലങ്ങളിലും അപ്രതീക്ഷിത തിരിച്ചടിയാണ് നേരിടുന്നത്.
കന്നി തിരഞ്ഞെടുപ്പിനെ നേരിടുന്ന വിജയിന്റെ പാർട്ടി പല നിർണ്ണായക മണ്ഡലങ്ങളിലും വ്യക്തമായ ലീഡ് നിലനിർത്തുന്നു. ഡി.എം.കെ, എ.ഐ.എ.ഡി.എം.കെ മുന്നണികളെ പിന്തള്ളിക്കൊണ്ടാണ് ടി.വി.കെ സ്ഥാനാർത്ഥികളുടെ ഈ മുന്നേറ്റം.ഭരണത്തുടർച്ച പ്രതീക്ഷിച്ചിറങ്ങിയ എം.കെ. സ്റ്റാലിന്റെ നേതൃത്വത്തിലുള്ള ഡി.എം.കെ സഖ്യത്തിന് പല കേന്ദ്രങ്ങളിലും വോട്ട് വിഹിതത്തിൽ വലിയ കുറവുണ്ടായിട്ടുണ്ട്.തമിഴ് രാഷ്ട്രീയത്തിലെ ദ്രാവിഡ പാർട്ടികളുടെ ആധിപത്യത്തിന് വെല്ലുവിളി ഉയർത്താൻ ടി.വി.കെയ്ക്ക് സാധിക്കുമെന്ന സൂചനകളാണ് നിലവിലെ വോട്ടുനില നൽകുന്നത്.
യുവജനങ്ങളുടെയും മാറ്റം ആഗ്രഹിക്കുന്ന വോട്ടർമാരുടെയും പിന്തുണ ടി.വി.കെയ്ക്ക് അനുകൂലമായെന്നാണ് പ്രാഥമിക വിലയിരുത്തൽ. വോട്ടെണ്ണൽ പൂർത്തിയാകുമ്പോൾ തമിഴ്നാട് രാഷ്ട്രീയത്തിൽ ഒരു പുതിയ ശക്തിയായി ടി.വി.കെ മാറുമോ എന്നാണ് രാജ്യം ഉറ്റുനോക്കുന്നത്.
