പാലക്കാട്: കേരളം ഉറ്റുനോക്കിയ പാലക്കാട് മണ്ഡലത്തിൽ യു.ഡി.എഫ് സ്ഥാനാർത്ഥി രമേഷ് പിഷാരടിക്ക് അട്ടിമറി വിജയം. ശക്തമായ ത്രികോണ മത്സരം നടന്ന മണ്ഡലത്തിൽ 13,147 വോട്ടുകളുടെ ഭൂരിപക്ഷത്തിനാണ് പിഷാരടി നിയമസഭയിലേക്ക് തിരഞ്ഞെടുക്കപ്പെട്ടത്. വോട്ടെണ്ണലിന്റെ ആദ്യ ഘട്ടങ്ങളിൽ ബി.ജെ.പി സ്ഥാനാർത്ഥി സി. കൃഷ്ണകുമാറും എൽ.ഡി.എഫ് സ്ഥാനാർത്ഥി പി. സരിനും തമ്മിൽ കടുത്ത പോരാട്ടം കാഴ്ചവെച്ചെങ്കിലും അവസാന റൗണ്ടുകളിൽ പിഷാരടി വ്യക്തമായ ലീഡ് ഉയർത്തുകയായിരുന്നു.
വോട്ടെണ്ണൽ പകുതി പിന്നിട്ടപ്പോഴാണ് രമേഷ് പിഷാരടി മുന്നേറ്റം തുടങ്ങിയത്. നഗരസഭാ പരിധിയിലെ വോട്ടുകൾ എണ്ണിത്തുടങ്ങിയതോടെ ലീഡ് നില പതിനായിരം കടന്നു.കഴിഞ്ഞ തവണ ഇ. ശ്രീധരനിലൂടെ ബി.ജെ.പി വലിയ മുന്നേറ്റം നടത്തിയ പാലക്കാട് ഇത്തവണ രണ്ടാം സ്ഥാനത്തേക്ക് തള്ളപ്പെട്ടു.വിജയവാർത്ത പുറത്തുവന്നതോടെ പാലക്കാട് നഗരത്തിൽ യു.ഡി.എഫ് പ്രവർത്തകർ വലിയ ആഘോഷങ്ങളാണ് സംഘടിപ്പിക്കുന്നത്.
സംസ്ഥാനത്തുടനീളം യു.ഡി.എഫ് തരംഗം ആഞ്ഞടിക്കുന്ന പശ്ചാത്തലത്തിൽ, പാലക്കാട് പിടിച്ചെടുക്കാൻ സാധിച്ചത് മുന്നണിക്ക് വലിയ രാഷ്ട്രീയ വിജയമായാണ് വിലയിരുത്തപ്പെടുന്നത്. കലാസാംസ്കാരിക മേഖലയിൽ നിന്നുള്ള പിഷാരടിയുടെ സാന്നിധ്യം വോട്ടർമാരെ സ്വാധീനിച്ചുവെന്നാണ് പ്രാഥമിക നിഗമനം.
