ന്യൂഡൽഹി: ‘ഓപ്പറേഷൻ സിന്ദൂർ’ ഭീകരവാദത്തിനെതിരായ ഇന്ത്യയുടെ ശക്തമായ മറുപടിയുടെയും ദേശീയ സുരക്ഷ സംരക്ഷിക്കാനുള്ള അചഞ്ചല പ്രതിബദ്ധതയുടെയും പ്രതിഫലനമായിരുന്നുവെന്ന് പ്രധാനമന്ത്രി നരേന്ദ്ര മോദി പറഞ്ഞു. പഹൽഗാം ഭീകരാക്രമണത്തിന് പിന്നാലെ ഇന്ത്യൻ സായുധസേന നടത്തിയ സൈനിക നടപടിയുടെ ഒന്നാം വാർഷികത്തോടനുബന്ധിച്ചായിരുന്നു പ്രധാനമന്ത്രിയുടെ പ്രതികരണം.
ഒരു വർഷം കഴിഞ്ഞിട്ടും ഭീകരവാദത്തെയും അതിന് പിന്തുണ നൽകുന്ന സംവിധാനങ്ങളെയും ഇല്ലാതാക്കാനുള്ള ഇന്ത്യയുടെ പ്രതിജ്ഞയിൽ മാറ്റമില്ലെന്ന് പ്രധാനമന്ത്രി സാമൂഹ്യമാധ്യമങ്ങളിലൂടെയുള്ള സന്ദേശത്തിൽ വ്യക്തമാക്കി. ഓപ്പറേഷൻ സിന്ദൂരിനിടെ ഇന്ത്യൻ സായുധസേന അതുല്യമായ ധൈര്യവും കൃത്യതയും ദൃഢനിശ്ചയവും പ്രകടിപ്പിച്ചുവെന്നും അദ്ദേഹം പറഞ്ഞു.
പഹൽഗാമിൽ നിരപരാധികളായ ഇന്ത്യക്കാരെ ആക്രമിച്ചവർക്കുള്ള യോജിച്ച മറുപടിയായിരുന്നു ഈ നടപടി എന്നും രാജ്യത്തെ ജനങ്ങൾ സേനയുടെ വീരത്വത്തെ ആദരിക്കുന്നുവെന്നും പ്രധാനമന്ത്രി കൂട്ടിച്ചേർത്തു. ഓപ്പറേഷൻ സിന്ദൂർ ഇന്ത്യൻ സേനകളുടെ ഏകോപന ശേഷിയും പ്രതിരോധ മേഖലയിലെ സ്വയംപര്യാപ്തതയും ലോകത്തിന് മുന്നിൽ തെളിയിച്ചുവെന്നും അദ്ദേഹം ചൂണ്ടിക്കാട്ടി.
2025 മേയ് 7 മുതൽ 10 വരെ പാകിസ്താനിലെയും പാക് അധീന കശ്മീരിലെയും ഭീകരകേന്ദ്രങ്ങൾ ലക്ഷ്യമിട്ട് ഇന്ത്യൻ സേന നടത്തിയ സംയുക്ത സൈനിക നീക്കമായിരുന്നു ഓപ്പറേഷൻ സിന്ദൂർ. 2025 ഏപ്രിൽ 22-ന് പഹൽഗാമിൽ നടന്ന ഭീകരാക്രമണത്തിൽ 26 പേർ കൊല്ലപ്പെട്ടതിന് പിന്നാലെയായിരുന്നു നടപടി.
