സിഡ്നി: വർഷങ്ങളോളം സിറിയയിലെ തടങ്കൽ പാളയങ്ങളിൽ കഴിഞ്ഞ ശേഷം ഈ ആഴ്ച ഓസ്ട്രേലിയയിൽ തിരിച്ചെത്തിയ ഇസ്ലാമിക് സ്റ്റേറ്റ് (IS) ബന്ധമുള്ള കുടുംബങ്ങളുടെ സ്വാതന്ത്ര്യം മണിക്കൂറുകൾ മാത്രം നീണ്ടുനിന്ന ഒന്നായി മാറി. വിമാനമിറങ്ങിയ ഉടൻ തന്നെ മൂന്ന് സ്ത്രീകളെ പോലീസ് അറസ്റ്റ് ചെയ്തു. ചെറിയ കുട്ടികളുമായി എത്തിയ നാലാമത്തെ സ്ത്രീയെ മാധ്യമപ്പട വളഞ്ഞെങ്കിലും, താനും ഉടൻ അറസ്റ്റിലായേക്കാം എന്ന ഭീതിയിലാണ് അവർ.
സിറിയയിലെ യുദ്ധാനന്തര ക്യാമ്പുകളിൽ കഴിയുന്ന തങ്ങളുടെ പൗരന്മാരെ തിരിച്ചെത്തിക്കുന്ന കാര്യത്തിൽ ഓസ്ട്രേലിയ വർഷങ്ങളായി വിമുഖത കാട്ടി വരികയായിരുന്നു. ഐ.എസ് ഭീകരർക്കൊപ്പം ചേർന്ന പുരുഷന്മാരുടെ ഭാര്യമാരും മക്കളുമാണ് ഈ ക്യാമ്പുകളിൽ നരകയാതന അനുഭവിച്ചിരുന്നത്. സമാനമായ സുരക്ഷാ, രാഷ്ട്രീയ പ്രശ്നങ്ങൾ നേരിടുന്ന ബ്രിട്ടൻ ഉൾപ്പെടെയുള്ള രാജ്യങ്ങളും ഇവരെ തിരിച്ചെടുക്കാൻ മടിക്കുകയാണ്.
കഴിഞ്ഞ ഡിസംബറിൽ ബോണ്ടി ബീച്ചിലെ ജൂത ചടങ്ങിൽ ഐ.എസ് സ്വാധീനത്താൽ നടന്ന വെടിവെയ്പ്പിൽ 15 പേർ കൊല്ലപ്പെട്ടതോടെ ഓസ്ട്രേലിയയിൽ ഈ കുടുംബങ്ങൾക്കെതിരെയുള്ള ജനവികാരം കടുത്തിരിക്കുകയാണ്. “നിങ്ങൾ സ്വയം തിരഞ്ഞെടുത്ത വഴിയാണെങ്കിൽ അതിന്റെ പ്രത്യാഘാതങ്ങൾ അനുഭവിക്കുക തന്നെ വേണം” എന്ന നിലപാടിലാണ് പ്രധാനമന്ത്രി ആന്തണി ആൽബനീസി.
സിറിയയിലെ അൽ-ഹോൾ (Al-Hol), അൽ-റോജ് (Al-Roj) എന്നീ ക്യാമ്പുകൾ തീവ്രവാദം വളരുന്ന കേന്ദ്രങ്ങളായും ‘ടിക്കിംഗ് ടൈം ബോംബുകളായും’ ദീർഘകാലമായി വിശേഷിപ്പിക്കപ്പെടുന്നുണ്ട്. ഫെബ്രുവരിയിൽ സിറിയൻ സൈന്യം അൽ-ഹോൾ ക്യാമ്പ് അടച്ചുപൂട്ടിയെങ്കിലും, വടക്കുകിഴക്കൻ കുർദിഷ് മേഖലയിലെ അൽ-റോജ് ക്യാമ്പിന്റെ ഭാവി ഇപ്പോഴും അനിശ്ചിതത്വത്തിലാണ്.
ബ്രിട്ടീഷ് പൗരത്വം റദ്ദാക്കപ്പെട്ട ഷമീമ ബീഗം ഉൾപ്പെടെ വിവിധ രാജ്യങ്ങളിൽ നിന്നുള്ള രണ്ടായിരത്തോളം പേർ ഇപ്പോഴും അൽ-റോജ് ക്യാമ്പിലുണ്ട്. ഇവരെ തിരിച്ചെത്തിക്കുന്നത് വൈകുന്നത് സുരക്ഷാ ഭീഷണി വർദ്ധിപ്പിക്കുമെന്നും എത്രയും വേഗം നാട്ടിലെത്തിച്ച് പുനരധിവാസ പ്രവർത്തനങ്ങൾ നടത്തുന്നതാണ് നല്ലതെന്നും സിഡ്നിയിലെ ഡോക്ടർ ജമാൽ റിഫി ഉൾപ്പെടെയുള്ള മനുഷ്യാവകാശ പ്രവർത്തകർ ചൂണ്ടിക്കാട്ടുന്നു.
അറസ്റ്റിലായ സ്ത്രീകൾക്കെതിരെ ഭീകരവാദ നിയമപ്രകാരം കടുത്ത നടപടികൾ ഉണ്ടാകുമെന്നാണ് സൂചന. വരും ദിവസങ്ങളിൽ കൂടുതൽ കുടുംബങ്ങളെ തിരിച്ചെത്തിക്കുമോ എന്ന കാര്യത്തിൽ ഓസ്ട്രേലിയൻ സർക്കാർ ഇതുവരെ വ്യക്തമായ മറുപടി നൽകിയിട്ടില്ല.
