മെൽബൺ: ഓസ്ട്രേലിയയിലെ പ്രമുഖ ബാങ്കുകളിലൊന്നായ നാഷണൽ ഓസ്ട്രേലിയ ബാങ്ക് (NAB) ഇന്ധനവില വർദ്ധനവിനെക്കുറിച്ച് ഗൗരവകരമായ മുന്നറിയിപ്പ് നൽകി. വരും മാസങ്ങളിൽ ഡീസൽ വില ലിറ്ററിന് 4 ഡോളറിന് മുകളിൽ എത്തിയേക്കാമെന്നാണ് ബാങ്കിലെ സാമ്പത്തിക വിദഗ്ധർ പ്രവചിക്കുന്നത്. നിലവിലെ ആഗോള എണ്ണ പ്രതിസന്ധിയും ഹോർമുസ് കടലിടുക്കിലെ (Strait of Hormuz) ഉപരോധവും തുടരുന്ന സാഹചര്യത്തിലാണിത്.
ഡീസൽ വിലയിലുണ്ടാകുന്ന ഇത്തരം വർദ്ധനവ് ഓസ്ട്രേലിയൻ സമ്പദ്വ്യവസ്ഥയെ ദോഷകരമായി ബാധിക്കും:ചരക്ക് നീക്കം (Freight), കൃഷി, ഖനനം, ഗതാഗത മേഖലകളിൽ ഡീസൽ ഒരു പ്രധാന ഘടകമായതിനാൽ ഉൽപ്പന്നങ്ങളുടെ വില കുത്തനെ ഉയരും. ഇന്ധനവില 4 ഡോളർ കടന്നാൽ പണപ്പെരുപ്പം (Inflation) റിസർവ് ബാങ്ക് (RBA) പ്രവചിച്ച 5.2 ശതമാനത്തിനും മുകളിൽ പോയേക്കാം.
പണപ്പെരുപ്പം നിയന്ത്രിക്കാനായി റിസർവ് ബാങ്ക് പലിശ നിരക്കുകൾ വീണ്ടും വർദ്ധിപ്പിക്കാൻ ഇത് കാരണമാകും. നിലവിൽ 4.35 ശതമാനമാണ് പലിശ നിരക്ക്.ഏപ്രിൽ ആദ്യം ഡീസൽ വില ലിറ്ററിന് 3.30 ഡോളർ വരെ എത്തിയിരുന്നു. യൂറോപ്യൻ സെൻട്രൽ ബാങ്കിന്റെ (ECB) കണ്ടെത്തലുകൾ കൂടി അടിസ്ഥാനമാക്കിയാണ് എൻഎബി ഈ നിഗമനത്തിലെത്തിയത്. ഹോർമുസ് കടലിടുക്കിലൂടെയുള്ള എണ്ണനീക്കത്തിൽ 60 ശതമാനം തടസ്സം നേരിടുകയും എണ്ണവില ബാരലിന് 145 യുഎസ് ഡോളറിൽ എത്തുകയും ചെയ്താൽ ഓസ്ട്രേലിയയിൽ ഡീസൽ വില 4 ഡോളർ കടക്കുമെന്ന് എൻഎബി അനലിസ്റ്റുകളായ വിൻസ് കാർസും ജെസ്സി കാമറൂണും വിലയിരുത്തുന്നു.
വരാനിരിക്കുന്ന ഫെഡറൽ ബജറ്റിലൂടെ പണപ്പെരുപ്പത്തിനെതിരായ പോരാട്ടത്തിൽ സഹായിക്കുമെന്ന് ട്രഷറർ ജിം ചാൽമേഴ്സ് വ്യക്തമാക്കിയിട്ടുണ്ട്. ബജറ്റിൽ പ്രഖ്യാപിച്ചേക്കാവുന്ന നികുതി ഇളവുകളോ ഇന്ധന എക്സൈസ് ഡ്യൂട്ടി കുറയ്ക്കലോ വിപണിയിൽ പണലഭ്യത വർദ്ധിപ്പിക്കുന്നത് പണപ്പെരുപ്പം കുറയ്ക്കാനുള്ള ആർബിഐയുടെ ശ്രമങ്ങളെ ബാധിച്ചേക്കുമെന്ന് ഗവർണർ മിഷേൽ ബുള്ളോക്ക് ആശങ്ക പ്രകടിപ്പിച്ചു
