ശബരിമല ശ്രീകോവിലിന്റെയും ദ്വാരപാലക വിഗ്രഹങ്ങളുടെയും സ്വർണമേൽപ്പാളികളിൽ നിന്ന് സ്വർണം നഷ്ടപ്പെട്ടെന്ന ആരോപണവുമായി ബന്ധപ്പെട്ട കേസിൽ അന്വേഷണം നടത്തുന്ന പ്രത്യേക അന്വേഷണസംഘം (SIT) കേരള ഹൈക്കോടതിയിൽ പുരോഗതി റിപ്പോർട്ട് സമർപ്പിച്ചു.
അന്വേഷണത്തിന്റെ അന്തിമഘട്ടത്തിൽ നിർണായക ശാസ്ത്രീയ പരിശോധനാ ഫലങ്ങൾ ലഭിക്കാനുണ്ടെന്ന് എസ്.ഐ.ടി അറിയിച്ചതിനെ തുടർന്ന് റിപ്പോർട്ട് സമർപ്പിക്കാൻ ഹൈക്കോടതി അധിക സമയം അനുവദിച്ചു. ജംഷഡ്പൂരിലെ ലബോറട്ടറിയിൽ പരിശോധനയ്ക്കായി അയച്ച 36 സാമ്പിളുകളുടെ വിശദമായ വിശകലന റിപ്പോർട്ട് ലഭിക്കാനിരിക്കുകയാണെന്ന് അന്വേഷണസംഘം കോടതിയെ അറിയിച്ചു.
സ്വർണത്തിന്റെ അളവിലും ഘടനയിലും ക്രമക്കേടുകൾ ഉണ്ടായിട്ടുണ്ടോ എന്ന് കണ്ടെത്തുന്നതിനായി XRF, ICP-MS, OES തുടങ്ങിയ സാങ്കേതിക പരിശോധനകളാണ് നടത്തുന്നത്. അന്വേഷണത്തിന്റെ ഭാഗമായി 391 സാക്ഷികളെ ചോദ്യം ചെയ്തതായും കേരളത്തിന് പുറമെ തമിഴ്നാട്, കർണാടക എന്നിവിടങ്ങളിലേക്കും അന്വേഷണം വ്യാപിപ്പിച്ചതായും എസ്.ഐ.ടി റിപ്പോർട്ടിൽ വ്യക്തമാക്കിയിട്ടുണ്ട്. പിടിച്ചെടുത്ത മൊബൈൽ ഫോണുകളും ഡിജിറ്റൽ രേഖകളും ഇപ്പോഴും പരിശോധിച്ചുവരികയാണ്.
2019-ൽ നടന്ന അറ്റകുറ്റപ്പണികൾക്കിടെ ശ്രീകോവിലിന്റെയും ദ്വാരപാലക വിഗ്രഹങ്ങളുടെയും സ്വർണമേൽപ്പാളികളിൽ നിന്ന് സ്വർണം അപഹരിക്കപ്പെട്ടെന്ന ആരോപണത്തെ തുടർന്നാണ് ഹൈക്കോടതിയുടെ മേൽനോട്ടത്തിൽ അന്വേഷണം ആരംഭിച്ചത്.
കേസിൽ സംഘടിതമായ രീതിയിൽ സ്വർണം നഷ്ടപ്പെടുത്തിയതായി എസ്.ഐ.ടി മുൻപ് കോടതിയെ അറിയിച്ചിരുന്നു. ശാസ്ത്രീയ പരിശോധനാ റിപ്പോർട്ടുകൾ ലഭിച്ചശേഷം അന്തിമ അന്വേഷണ റിപ്പോർട്ട് സമർപ്പിക്കുമെന്ന് എസ്.ഐ.ടി കോടതിയെ അറിയിച്ചു. കേസ് വീണ്ടും പരിഗണിക്കുന്നതിനായി ഹൈക്കോടതി തുടർ തീയതിയിലേക്ക് മാറ്റി.
