ഇറാൻ ഇസ്രായേലിലേക്ക് മിസൈൽ ആക്രമണം നടത്തിയതിന് പിന്നാലെ തിരിച്ചടിയായി സൈനിക നടപടി സ്വീകരിക്കരുതെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനോട് ആവശ്യപ്പെട്ടതായി റിപ്പോർട്ടുകൾ. മേഖലയിലെ സംഘർഷം കൂടുതൽ വഷളാകാതിരിക്കാനും ഇറാനുമായി പുരോഗമിക്കുന്ന നയതന്ത്ര ചർച്ചകൾക്ക് തിരിച്ചടി ഉണ്ടാകാതിരിക്കാനുമാണ് ട്രംപിന്റെ ഇടപെടൽ.
ഇസ്രായേൽ ലെബനനിലെ ബെയ്റൂട്ടിൽ നടത്തിയ ആക്രമണത്തിന് മറുപടിയായാണ് ഇറാൻ ഇസ്രായേലിനെ ലക്ഷ്യമിട്ട് മിസൈലുകൾ പ്രയോഗിച്ചതെന്നാണ് റിപ്പോർട്ടുകൾ. ഇതിന് പിന്നാലെ നെതന്യാഹുവുമായി ഫോണിൽ സംസാരിച്ച ട്രംപ്, പ്രതികാര നടപടി സാഹചര്യം കൂടുതൽ സങ്കീർണമാക്കുമെന്നും സംഘർഷം നീണ്ടുനിൽക്കാൻ ഇടയാക്കുമെന്നും മുന്നറിയിപ്പ് നൽകിയതായി അമേരിക്കൻ മാധ്യമങ്ങൾ റിപ്പോർട്ട് ചെയ്തു.
ഇറാനുമായി ഒരു ധാരണയിലെത്താനുള്ള ശ്രമങ്ങൾ അവസാനഘട്ടത്തിലാണെന്നും നിലവിലെ സാഹചര്യം ആ നീക്കങ്ങളെ ബാധിക്കരുതെന്നുമാണ് ട്രംപ് അഭിപ്രായപ്പെട്ടത്. ഇരു രാജ്യങ്ങളും കൂടുതൽ സംയമനം പാലിക്കണമെന്നും അദ്ദേഹം ആവശ്യപ്പെട്ടു. എന്നാൽ ട്രംപിന്റെ അഭ്യർഥനയ്ക്കുശേഷവും ഇറാനിലെ ചില സൈനിക ലക്ഷ്യങ്ങൾക്കെതിരെ ഇസ്രായേൽ ആക്രമണം നടത്തിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
അതേസമയം, പുതിയ ആക്രമണങ്ങൾ സമാധാന ചർച്ചകളെ ബാധിക്കില്ലെന്നും ഇറാനുമായുള്ള ചർച്ചകൾ തുടരുമെന്നും ട്രംപ് പ്രതികരിച്ചു. മിഡിൽ ഈസ്റ്റിലെ സംഘർഷാവസ്ഥ തുടരുന്നതിനിടെ അമേരിക്ക, ഇസ്രായേൽ, ഇറാൻ എന്നീ രാജ്യങ്ങൾക്കിടയിലെ നയതന്ത്ര നീക്കങ്ങൾ അന്താരാഷ്ട്ര ശ്രദ്ധ നേടുകയാണ്.
