കോട്ടയം: കോട്ടയം നഗരത്തിലും പരിസരപ്രദേശങ്ങളിലും അനുഭവപ്പെടുന്ന രൂക്ഷമായ ഗതാഗതക്കുരുക്കിന് ശാശ്വത പരിഹാരം കണ്ടെത്തുന്നതിന്റെ ഭാഗമായി കോട്ടയം ജില്ലാ കളക്ടർ ചേതൻകുമാർ മീണയുടെ നേതൃത്വത്തിൽ കോട്ടയം ഓൾഡ് എം.സി റോഡിൽ പ്രത്യേക പരിശോധന നടത്തി. നഗരത്തിലെ വാഹനത്തിരക്ക് നിയന്ത്രിക്കുന്നതിനും കാൽനടയാത്രക്കാരുടെ സുരക്ഷ ഉറപ്പാക്കുന്നതിനും സ്വീകരിക്കേണ്ട അടിയന്തര നടപടികൾ വിലയിരുത്താനാണ് കളക്ടർ നേരിട്ട് സ്ഥലത്തെത്തിയത്.
ഓൾഡ് എം.സി റോഡിലെ നിലവിലെ ഗതാഗത സംവിധാനങ്ങൾ, അനധികൃത പാർക്കിങ്, റോഡ് കൈയേറ്റങ്ങൾ എന്നിവ പരിശോധിച്ച അദ്ദേഹം, കുരുക്ക് ഒഴിവാക്കാൻ വരുത്തേണ്ട മാറ്റങ്ങളെക്കുറിച്ച് ബന്ധപ്പെട്ട ഉദ്യോഗസ്ഥരുമായി ചർച്ച നടത്തി. വിവിധ വകുപ്പുകളെ ഏകോപിപ്പിച്ചു കൊണ്ട് നഗരത്തിലെ ഗതാഗത പരിഷ്കരണ പദ്ധതികൾ വേഗത്തിൽ നടപ്പിലാക്കുമെന്നും ഇതിനായി വിശദമായ മാസ്റ്റർ പ്ലാൻ തയ്യാറാക്കുമെന്നും ജില്ലാ കളക്ടർ പരിശോധനയ്ക്ക് ശേഷം വ്യക്തമാക്കി. റവന്യൂ, പൊലീസ്, മോട്ടോർ വാഹന വകുപ്പ്, നഗരസഭ തുടങ്ങിയ വിവിധ വകുപ്പുകളിലെ ഉദ്യോഗസ്ഥരും കളക്ടറോടൊപ്പം പരിശോധനാ സംഘത്തിലുണ്ടായിരുന്നു.
