കോഴിക്കോട്: നിപ വൈറസ് ബാധ സ്ഥിരീകരിച്ച കോഴിക്കോട് ഫറോക്ക് സ്വദേശിയായ 43-കാരന്റെ ആരോഗ്യനില ഗുരുതരമായി തുടരുന്നു. രോഗിയെ കോഴിക്കോട് മെഡിക്കൽ കോളജ് ആശുപത്രിയിലെ പ്രത്യേക ഐസലേഷൻ വാർഡിൽ വെന്റിലേറ്റർ സഹായത്തോടെ ചികിത്സിക്കുകയാണെന്ന് ആരോഗ്യവകുപ്പ് അറിയിച്ചു.
ആദ്യം സ്വകാര്യ ആശുപത്രിയിൽ ചികിത്സയിലായിരുന്ന രോഗിക്ക് കടുത്ത പനി, ഓർമക്കുറവ്, മസ്തിഷ്കജ്വരത്തിന് സമാനമായ ലക്ഷണങ്ങൾ എന്നിവ പ്രകടമായതിനെ തുടർന്ന് നിപ പരിശോധന നടത്തി. മെഡിക്കൽ കോളജിലെ വി.ആർ.ഡി.എൽ ലാബിൽ നടത്തിയ പരിശോധനയിൽ രോഗബാധ കണ്ടെത്തിയതോടെയാണ് പ്രത്യേക ഐസലേഷൻ വാർഡിലേക്ക് മാറ്റിയത്.
രോഗിയുടെ സമ്പർക്കപ്പട്ടിക തയ്യാറാക്കുന്ന നടപടികൾ ആരോഗ്യവകുപ്പ് വേഗത്തിലാക്കിയിട്ടുണ്ട്. കുടുംബാംഗങ്ങളെയും അടുത്ത സമ്പർക്കത്തിലുള്ളവരെയും നിരീക്ഷണത്തിലാക്കുകയും ചിലരുടെ സാമ്പിളുകൾ പരിശോധനയ്ക്കായി അയയ്ക്കുകയും ചെയ്തിട്ടുണ്ട്. രോഗത്തിന്റെ ഉറവിടം കണ്ടെത്തുന്നതിനുള്ള അന്വേഷണവും പുരോഗമിക്കുകയാണ്. മെഡിക്കൽ കോളജ് ആശുപത്രിയിൽ പ്രത്യേക നിയന്ത്രണങ്ങൾ ഏർപ്പെടുത്തിയിട്ടുണ്ട്.
ഐസലേഷൻ വാർഡിന് സമീപത്തെ മേഖലകളിൽ പ്രവേശനം നിയന്ത്രിച്ചിരിക്കുകയാണ്. രോഗവ്യാപനം തടയുന്നതിനുള്ള എല്ലാ പ്രോട്ടോക്കോളുകളും കർശനമായി പാലിക്കണമെന്ന് ആശുപത്രി അധികൃതർ നിർദേശിച്ചു.
കോഴിക്കോട് ജില്ലയിൽ ആരോഗ്യവകുപ്പ് ജാഗ്രത ശക്തമാക്കിയിരിക്കുകയാണ്. രോഗലക്ഷണങ്ങൾ ഉള്ളവർ ഉടൻ ആരോഗ്യകേന്ദ്രങ്ങളെ സമീപിക്കണമെന്നും പൊതുജനങ്ങൾ അനാവശ്യ ആശങ്കയ്ക്ക് പകരം മുൻകരുതൽ നിർദേശങ്ങൾ പാലിക്കണമെന്നും അധികൃതർ അറിയിച്ചു.
