ജനീവ: യൂറോപ്പിൽ തുടരുന്ന അതിശക്തമായ ഉഷ്ണതരംഗത്തെ തുടർന്ന് ജൂൺ 21 മുതൽ 1,300-ലധികം അധികമരണങ്ങൾ (excess deaths) റിപ്പോർട്ട് ചെയ്തതായി ലോകാരോഗ്യ സംഘടന (WHO) അറിയിച്ചു. ഭൂഖണ്ഡത്തിന്റെ വിവിധ ഭാഗങ്ങളിൽ 40 ഡിഗ്രി സെൽഷ്യസിന് മുകളിലുള്ള താപനില രേഖപ്പെടുത്തിയതോടെ ആരോഗ്യ സംവിധാനങ്ങൾ കടുത്ത സമ്മർദം നേരിടുകയാണ്.
ഫ്രാൻസിലാണ് ഏറ്റവും കൂടുതൽ ആഘാതമുണ്ടായത്. അവിടെ മാത്രം ഏകദേശം 1,000 അധികമരണങ്ങൾ റിപ്പോർട്ട് ചെയ്തതായി ആരോഗ്യ അധികൃതർ അറിയിച്ചു. മരണങ്ങളിൽ ഭൂരിഭാഗവും പ്രായമായവരാണ്. ജർമനി, പോളണ്ട്, ചെക്ക് റിപ്പബ്ലിക്, ഹംഗറി എന്നിവിടങ്ങളിലും റെക്കോർഡ് താപനില രേഖപ്പെടുത്തിയിട്ടുണ്ട്.
കാലാവസ്ഥാ വ്യതിയാനത്തിന്റെ ഫലമായാണ് ഇത്തരം അതിശക്തമായ ഉഷ്ണതരംഗങ്ങൾ കൂടുതൽ തീവ്രമാകുന്നതെന്ന് വിദഗ്ധർ മുന്നറിയിപ്പ് നൽകുന്നു. പ്രായമായവരും കുട്ടികളും ആരോഗ്യപ്രശ്നങ്ങളുള്ളവരും അതീവ ജാഗ്രത പാലിക്കണമെന്നും ആവശ്യമായ മുൻകരുതലുകൾ സ്വീകരിക്കണമെന്നും ലോകാരോഗ്യ സംഘടന നിർദേശിച്ചു.
