കെയ്ൻസ്: ഓസ്ട്രേലിയയിലെ കെയ്ൻസിൽ ആവേശമുണർത്താൻ ദേശീയതല വടംവലി ടൂർണമെന്റും കമ്മ്യൂണിറ്റി ആഘോഷവും സംഘടിപ്പിക്കുന്നു. ഈ വരുന്ന ജൂലൈ 19 ഞായറാഴ്ച റെഡ്ലിഞ്ചിലെ സെന്റ് ആൻഡ്രൂസ് കാത്തലിക് കോളേജ് ഗ്രൗണ്ടിലാണ് ‘കെയ്ൻസ് ടഗ് ഓഫ് വാർ സെലിബ്രേഷൻ’ നടക്കുക. മലയാളി അസോസിയേഷൻ കെയ്ൻസിന്റെ നേതൃത്വത്തിലാണ് ഓസ്ട്രേലിയയിലെ മുൻനിര വടംവലി ചാമ്പ്യന്മാരും പ്രാദേശിക ടീമുകളും മാറ്റുരയ്ക്കുന്ന ഈ വൻകിട കായിക മാമാങ്കം അരങ്ങേറുന്നത്. വലിയ ആവേശത്തോടെ സംഘടിപ്പിക്കുന്ന ഈ ടൂർണമെന്റിൽ ആകെ 17,000 ഓസ്ട്രേലിയൻ ഡോളറാണ് സമ്മാനത്തുകയായി നിശ്ചയിച്ചിരിക്കുന്നത്. ഇതിൽ ഒന്നാം സ്ഥാനം കൈക്കലാക്കുന്ന ടീമിന് 7,001 ഓസ്ട്രേലിയൻ ഡോളറിന്റെ ഗ്രാൻഡ് പ്രൈസ് സ്വന്തമാക്കാം.
കെയ്ൻസ് റീജിയണൽ കൗൺസിൽ മേയർ ആമി ഈഡനും മറ്റ് പ്രാദേശിക കൗൺസിലർമാരും ചടങ്ങിൽ മുഖ്യാതിഥികളായി പങ്കെടുത്ത് മത്സരങ്ങൾ ഔദ്യോഗികമായി ഉദ്ഘാടനം ചെയ്യുകയും മത്സരാർത്ഥികളെ പ്രോത്സാഹിപ്പിക്കുകയും ചെയ്യും. പ്രാദേശികമായ കായിക പങ്കാളിത്തം പ്രോത്സാഹിപ്പിക്കുന്നതിനൊപ്പം തന്നെ, ഫാർ നോർത്ത് മേഖലയിലെ കുടുംബങ്ങൾക്ക് ഒത്തുകൂടാനും ആസ്വദിക്കാനുമുള്ള ഒരു മികച്ച വേദിയൊരുക്കുക കൂടിയാണ് ഈ സൌജന്യ പരിപാടിയിലൂടെ അസോസിയേഷൻ ലക്ഷ്യമിടുന്നത്. വടംവലി മത്സരങ്ങൾക്ക് പുറമെ, കെയ്ൻസിലെയും പരിസരപ്രദേശങ്ങളിലെയും ജനങ്ങൾക്കായി പരമ്പരാഗത ദക്ഷിണേന്ത്യൻ ഭക്ഷണശാലകൾ, ആകർഷകമായ മാജിക് ഷോ, കുട്ടികൾക്കായുള്ള വിവിധ വിനോദ പരിപാടികൾ എന്നിവയും ചടങ്ങിന്റെ ഭാഗമായി ഒരുക്കിയിട്ടുണ്ട്. ഓസ്ട്രേലിയയിലെ ഏറ്റവും കരുത്തരായ ചാമ്പ്യന്മാരുമായി കെയ്ൻസിലെ ടീമുകൾ നേരിട്ട് ഏറ്റുമുട്ടുന്ന കാഴ്ച നാട്ടുകാർക്ക് ഒരു പുതിയ അനുഭവമായിരിക്കുമെന്ന് അസോസിയേഷൻ ഭാരവാഹികൾ അറിയിച്ചു.
റെഡ്ലിഞ്ച് ഇൻടേക്ക് റോഡിലുള്ള സെന്റ് ആൻഡ്രൂസ് കാത്തലിക് കോളേജിൽ ജൂലൈ 19 ഞായറാഴ്ച രാവിലെ 9:00 മണി മുതൽ വൈകിട്ട് 4:00 മണി വരെയാണ് കാണികൾക്കായി ഗേറ്റുകൾ തുറന്നിടുക. മത്സരങ്ങൾ കാണാനെത്തുന്ന പൊതുജനങ്ങൾക്ക് പ്രവേശിപ്പിക്കുന്നത് പൂർണ്ണമായും സൗജന്യമായിരിക്കും. അന്നേദിവസം രാവിലെ 10:00 മണിക്ക് മേയർ ആമി ഈഡന്റെ സാന്നിധ്യത്തിൽ ഔദ്യോഗിക ഉദ്ഘാടന ചടങ്ങുകൾ നടക്കും. തുടർന്ന് 11:00 മണിയോടെ ടീമുകൾ തമ്മിലുള്ള ആദ്യ ഘട്ട വടംവലി മത്സരങ്ങൾക്ക് തുടക്കമാകും.
ടൂർണമെന്റിനെക്കുറിച്ചുള്ള കൂടുതൽ വിവരങ്ങൾക്കും രജിസ്ട്രേഷനുമായി മലയാളി അസോസിയേഷൻ ഭാരവാഹികളായ ജോജു വർഗീസ് (PRO), നാദിയ മുഹമ്മദ് (മീഡിയ കോർഡിനേറ്റർ) എന്നിവരുമായി 0426865591 എന്ന നമ്പറിലോ malayaliassociationcairns@gmail.com എന്ന ഇമെയിൽ വിലാസത്തിലോ ബന്ധപ്പെടാവുന്നതാണെന്ന് ഓർഗനൈസേഷൻ അറിയിച്ചു.
