ടെൽ അവീവ്: ഇസ്രയേൽ പാർലമെന്റായ ക്നെസെറ്റ് ഔദ്യോഗികമായി പിരിച്ചുവിട്ടു. ഒക്ടോബർ 27-ന് നടക്കാനിരിക്കുന്ന പൊതുതെരഞ്ഞെടുപ്പിന് മുന്നോടിയായാണ് നടപടി. പ്രധാനമന്ത്രി ബെഞ്ചമിൻ നെതന്യാഹുവിന്റെ നേതൃത്വത്തിലുള്ള ഭരണസഖ്യം കാലാവധി അവസാനിക്കുന്നതിന് തൊട്ടുമുമ്പാണ് പാർലമെന്റ് പിരിച്ചുവിടാൻ തീരുമാനിച്ചത്.
തിരഞ്ഞെടുപ്പ് ഫലം പ്രഖ്യാപിക്കുന്നതുവരെ നെതന്യാഹു സർക്കാർ കെയർടേക്കർ സർക്കാരായി തുടരും. 62-0 എന്ന വോട്ടിനാണ് ക്നെസെറ്റ് സ്വയം പിരിച്ചുവിടാനുള്ള പ്രമേയം അംഗീകരിച്ചത്. 1988-ന് ശേഷം ഒരു പാർലമെന്റ് പൂർണ കാലാവധി പൂർത്തിയാക്കി പിരിച്ചുവിടുന്നത് അപൂർവ സംഭവമാണെന്നും റിപ്പോർട്ടുകൾ ചൂണ്ടിക്കാട്ടുന്നു.
2023-ന് ശേഷമുള്ള ദീർഘകാല യുദ്ധസാഹചര്യത്തിന് പിന്നാലെ നടക്കുന്ന ആദ്യ പൊതുതെരഞ്ഞെടുപ്പായതിനാൽ ഇത്തവണത്തെ മത്സരം ഏറെ ശ്രദ്ധേയമാണ്. ലിക്കുഡ് പാർട്ടിയും സഖ്യകക്ഷികളും അധികാരം നിലനിർത്താൻ ശ്രമിക്കുമ്പോൾ, നഫ്താലി ബെന്നറ്റും ഗാഡി ഐസൻകോട്ടും ഉൾപ്പെടെയുള്ള പ്രതിപക്ഷ നേതാക്കൾ ശക്തമായ വെല്ലുവിളി ഉയർത്തുന്ന സാഹചര്യമാണ്.
തിരഞ്ഞെടുപ്പിന് മുന്നോടിയായി അൾട്രാ-ഓർത്തഡോക്സ് വിഭാഗത്തിന്റെ സൈനിക സേവനവുമായി ബന്ധപ്പെട്ടതടക്കമുള്ള വിവാദ ബില്ലുകൾ ഭരണപക്ഷം വേഗത്തിൽ പാസാക്കിയതും രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്.
