കാൻബറ: ഓസ്ട്രേലിയൻ റോയൽ നേവിയിലെ മുൻ മുതിർന്ന ഉദ്യോഗസ്ഥനെതിരെ സൈനിക കോടതി (Court Martial) വിചാരണ നടക്കുമെന്ന് പ്രതിരോധമന്ത്രി റിച്ചാർഡ് മാർൾസ് സ്ഥിരീകരിച്ചു. എന്നാൽ, പ്രതിയുടെ പേര് പ്രസിദ്ധീകരിക്കുന്നത് സൈനിക കോടതി വിലക്കിയിരിക്കുകയാണ്.
സെപ്റ്റംബർ 14 മുതൽ ആറാഴ്ച വരെ നീളുന്ന വിചാരണയിൽ മുൻ ഉദ്യോഗസ്ഥൻ എട്ട് കുറ്റങ്ങൾ നേരിടും. വെസ്റ്റേൺ ഓസ്ട്രേലിയയിലെ പ്രതിരോധ കരാറുകളുമായി ബന്ധപ്പെട്ട ആരോപണങ്ങളാണ് കേസിന് ആധാരമെന്നാണ് റിപ്പോർട്ടുകൾ. ആരോപണങ്ങൾ നടന്നത് 2022-ൽ അൽബനീസ് സർക്കാർ അധികാരത്തിലെത്തുന്നതിന് മുമ്പാണെന്ന് മാധ്യമങ്ങൾ റിപ്പോർട്ട് ചെയ്തിട്ടുണ്ട്.
ചീഫ് ജഡ്ജ് അഡ്വക്കേറ്റ് മേജർ ജനറൽ മൈക്കൽ കൗവൻ പുറപ്പെടുവിച്ച ഉത്തരവുപ്രകാരം പ്രതിയെ “ഓഫീസർ ബ്രൗൺ” എന്ന വ്യാജനാമത്തിൽ മാത്രമേ പരാമർശിക്കാവൂ. റോയൽ ഓസ്ട്രേലിയൻ നേവിയിലെ “സ്റ്റാർ റാങ്ക്” ഉദ്യോഗസ്ഥനാണെന്ന വിവരം മാത്രമാണ് പരസ്യമാക്കിയിട്ടുള്ളത്. ഇതിൽ കൊമഡോർ, റിയർ അഡ്മിറൽ, വൈസ് അഡ്മിറൽ തുടങ്ങിയ ഉയർന്ന റാങ്കുകൾ ഉൾപ്പെടുന്നു.
പ്രതിരോധ വകുപ്പ് നിയമപരവും സ്വകാര്യതയുമായി ബന്ധപ്പെട്ട ബാധ്യതകൾ ചൂണ്ടിക്കാട്ടി കേസിന്റെ കൂടുതൽ വിവരങ്ങൾ പുറത്തുവിടാൻ വിസമ്മതിച്ചു. സൈനിക കോടതിയിലൂടെയുള്ള വിചാരണ ഉചിതമാണെന്നും, കേസ് നിലവിൽ നിയമനടപടിയിലായതിനാൽ കൂടുതൽ പ്രതികരിക്കില്ലെന്നും പ്രതിരോധമന്ത്രി റിച്ചാർഡ് മാർൾസ് അറിയിച്ചു.
അതേസമയം, പ്രതിയുടെ പേരും ആരോപണങ്ങളുടെ വിശദാംശങ്ങളും രഹസ്യമാക്കാൻ വിശ്വസനീയമായ കാരണമില്ലെന്ന് ഗ്രീൻസ് പാർട്ടിയുടെ പ്രതിരോധ വക്താവ് ഡേവിഡ് ഷൂബ്രിഡ്ജ് പ്രതികരിച്ചു. പൊതുതാൽപര്യവുമായി ബന്ധപ്പെട്ട വിഷയങ്ങളിൽ കൂടുതൽ സുതാര്യത വേണമെന്നും അദ്ദേഹം ആവശ്യപ്പെട്ടു.
