ന്യൂഡൽഹി: പരീക്ഷാ പരിഷ്കാരങ്ങളും കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെക്കണമെന്ന ആവശ്യവും ഉന്നയിച്ച് സമരം നടത്തുന്ന കോക്രോച്ച് ജനത പാർട്ടി (CJP) പ്രതിനിധികളുമായി കേന്ദ്രമന്ത്രിമാർ നടത്തിയ രണ്ടാംഘട്ട ചർച്ചയിൽ മൂന്ന് പ്രധാന ആവശ്യങ്ങളിൽ രണ്ടെണ്ണം തത്ത്വത്തിൽ അംഗീകരിച്ചതായി സി.ജെ.പി. അറിയിച്ചു. എന്നാൽ ധർമേന്ദ്ര പ്രധാൻ രാജിവെക്കണമെന്ന ആവശ്യത്തിൽ അന്തിമതീരുമാനം അറിയിക്കാൻ കേന്ദ്രം കൂടുതൽ സമയം തേടിയതായി പാർട്ടി വ്യക്തമാക്കി.
യൂണിയൻ മന്ത്രിമാരായ ജെ.പി. നദ്ദയും ജിതേന്ദ്ര സിങ്ങും സി.ജെ.പി. പ്രതിനിധികളുമായി ഏകദേശം രണ്ട് മണിക്കൂർ ചർച്ച നടത്തി. വിദ്യാർഥി പ്രതിഷേധക്കാർക്കെതിരെ നിയമനടപടികൾ സ്വീകരിക്കാതിരിക്കണമെന്നും, പരീക്ഷാ ക്രമക്കേടുകളുമായി ബന്ധപ്പെട്ട് ആത്മഹത്യ ചെയ്ത വിദ്യാർഥികളുടെ കുടുംബങ്ങൾക്ക് നഷ്ടപരിഹാരം നൽകണമെന്നുമുള്ള ആവശ്യങ്ങളിൽ സർക്കാർ തത്ത്വത്തിൽ അനുകൂല നിലപാട് സ്വീകരിച്ചതായി സി.ജെ.പി. വക്താക്കൾ പറഞ്ഞു.
ധർമേന്ദ്ര പ്രധാൻ രാജിവെക്കുകയോ മന്ത്രിസഭയിൽ നിന്ന് ഒഴിവാക്കുകയോ വേണമെന്ന ആവശ്യത്തിൽ സർക്കാർ ആഭ്യന്തര കൂടിയാലോചനകൾക്ക് ശേഷം ഇന്ന് നിലപാട് അറിയിക്കാമെന്ന് അറിയിച്ചതായും സി.ജെ.പി. വ്യക്തമാക്കി. ഈ വിഷയത്തിൽ കേന്ദ്രവുമായി വീണ്ടും ചർച്ച നടത്തുമെന്നും പാർട്ടി അറിയിച്ചു.
അതേസമയം, ചർച്ചയിൽ മൂന്ന് പ്രധാന ആവശ്യങ്ങളും പരീക്ഷാ സംവിധാനവുമായി ബന്ധപ്പെട്ട അഞ്ച് പരിഷ്കരണ നിർദേശങ്ങളും പരിഗണിച്ചതായി കേന്ദ്രമന്ത്രി ജെ.പി. നദ്ദ അറിയിച്ചു. സർക്കാർ ആഭ്യന്തര ചർച്ചകൾക്ക് ശേഷം തുടർനിലപാട് അറിയിക്കുമെന്നും അദ്ദേഹം വ്യക്തമാക്കി.
