ലിസ്ബൺ: ഫിഫ പ്രസിഡന്റ് ജിയാനി ഇൻഫാന്റീനോ രാജിവയ്ക്കണമെന്ന് ആവശ്യപ്പെട്ട് പോർച്ചുഗൽ ഫുട്ബോൾ ഇതിഹാസം ലൂയിസ് ഫിഗോ രംഗത്തെത്തി. സമൂഹമാധ്യമത്തിലൂടെയാണ് ഫിഗോ തന്റെ നിലപാട് അറിയിച്ചത്.
ഫുട്ബോൾ ലോകത്തെ നിരവധി പേരോടൊപ്പം താനും ഇൻഫാന്റീനോ രാജിവയ്ക്കണമെന്ന് ആവശ്യപ്പെടുകയാണെന്ന് ഫിഗോ കുറിച്ചു. ഫിഫ പ്രസിഡന്റ് സ്ഥാനത്തിന്റെ അന്തസ്സ് ഇൻഫാന്റീനോ തകർത്തുവെന്നും, മുതിർന്ന ഉദ്യോഗസ്ഥരുടെയും ഉപദേശകരുടെയും ഫുട്ബോൾ സമൂഹത്തിലെ വലിയൊരു വിഭാഗത്തിന്റെയും വിശ്വാസം അദ്ദേഹത്തിന് നഷ്ടമായെന്നും ഫിഗോ ആരോപിച്ചു. ഫുട്ബോളിനെ സംരക്ഷിക്കാൻ ഇപ്പോഴും വൈകിയിട്ടില്ലെന്നും അതിനാൽ ഇൻഫാന്റീനോ സ്ഥാനം ഒഴിയണമെന്നും അദ്ദേഹം ആവശ്യപ്പെട്ടു.
സമീപകാലത്ത് ഫിഫയുടെ വിവാദ വാണിജ്യ-നിക്ഷേപ പദ്ധതിയെ തുടർന്ന് ഇൻഫാന്റീനോക്കെതിരെ വ്യാപക വിമർശനമാണ് ഉയർന്നത്. വിവിധ ഫുട്ബോൾ സംഘടനകളും പ്രമുഖരും അദ്ദേഹത്തിന്റെ നേതൃത്വത്തെ ചോദ്യം ചെയ്തിട്ടുണ്ട്.
പോർച്ചുഗലിന്റെ എക്കാലത്തെയും മികച്ച താരങ്ങളിലൊരാളായ ഫിഗോ ദേശീയ ടീമിനായി 127 മത്സരങ്ങളിൽ നിന്ന് 32 ഗോൾ നേടിയിട്ടുണ്ട്. സ്പോർട്ടിംഗ് ലിസ്ബൺ, ബാഴ്സലോണ, റയൽ മാഡ്രിഡ്, ഇന്റർ മിലാൻ എന്നീ പ്രമുഖ ക്ലബുകൾക്കായും അദ്ദേഹം കളിച്ചിട്ടുണ്ട്.
