ടെഹ്റാൻ: ഇറാൻ പരമോന്നത നേതാവ് മുജ്തബ ഖമനയിയുടെ ആരോഗ്യനില ഗുരുതരമാണെന്ന റിപ്പോർട്ടുകൾക്കിടെ, അദ്ദേഹത്തിന്റെ പുതിയ ദൃശ്യങ്ങൾ ഇറാൻ പുറത്തുവിട്ടു. ഇറാൻ സെമി-ഓദ്യോഗിക വാർത്താ ഏജൻസിയായ മെഹർ ന്യൂസാണ് വീഡിയോ പുറത്തുവിട്ടത്.
ഏകദേശം 12 സെക്കൻഡ് ദൈർഘ്യമുള്ള വീഡിയോയിൽ മുജ്തബ ഖമനയി ആരോഗ്യവാനായി കാണപ്പെടുന്നുണ്ട്. എന്നാൽ വീഡിയോ എപ്പോൾ ചിത്രീകരിച്ചതാണെന്ന് വ്യക്തമല്ല. അതിനാൽ നിലവിലെ ആരോഗ്യനില സംബന്ധിച്ച് വീഡിയോയിൽനിന്ന് വ്യക്തമായ നിഗമനത്തിലെത്താനാകില്ല.
കഴിഞ്ഞ ദിവസങ്ങളിൽ ഇസ്രയേൽ മാധ്യമങ്ങൾ ഖമനയി അതീവ ഗുരുതരാവസ്ഥയിലാണെന്ന റിപ്പോർട്ടുകൾ പുറത്തുവിട്ടിരുന്നു. ഇതിന് പിന്നാലെയാണ് ഇറാൻ അദ്ദേഹത്തിന്റെ ദൃശ്യങ്ങൾ പുറത്തുവിട്ടത്. അഭ്യൂഹങ്ങൾ തള്ളിക്കളയുന്നതിനും അദ്ദേഹത്തിന്റെ ആരോഗ്യനില സംബന്ധിച്ച് ആശ്വാസം നൽകുന്നതിനുമുള്ള നീക്കമായാണ് ഇത് വിലയിരുത്തപ്പെടുന്നത്.
അതേസമയം, വീഡിയോയുടെ ചിത്രീകരണ തീയതി പുറത്തുവിടാത്ത സാഹചര്യത്തിൽ ഖമനയിയുടെ നിലവിലെ ആരോഗ്യനിലയെക്കുറിച്ചുള്ള സ്വതന്ത്ര സ്ഥിരീകരണം ലഭിച്ചിട്ടില്ല.
