കൊല്ലം: നീണ്ടകരയിൽ മത്സ്യബന്ധനത്തിനിടെ വള്ളം മറിഞ്ഞ് കടലിൽ കാണാതായ ഗൗതം കൃഷ്ണയ്ക്കായി 11-ാം ദിവസവും തിരച്ചിൽ തുടരുന്നതിനിടെ മുഖ്യമന്ത്രി വി.ഡി. സതീശനും വനം-വന്യജീവി മന്ത്രി ഷിബു ബേബി ജോണും ഗൗതത്തിന്റെ വീട്ടിലെത്തി കുടുംബത്തെ സന്ദർശിച്ചു. ഗൗതത്തിന്റെ അമ്മയുമായി മുഖ്യമന്ത്രി സംസാരിച്ചു.
ജൂലൈ 31നാണ് ഗൗതം കൃഷ്ണയെ നീണ്ടകരയിൽ മത്സ്യബന്ധന വള്ളം അപകടത്തിൽപ്പെട്ടതിനെ തുടർന്ന് കാണാതായത്. അപകടത്തിൽ ഗൗതത്തിന്റെ പിതാവ് രാധാകൃഷ്ണനും മുത്തച്ഛൻ രാജീവനും മരിച്ചിരുന്നു.
ഗൗതത്തെ കണ്ടെത്താൻ സാധ്യമായ എല്ലാ സംവിധാനങ്ങളും ഉപയോഗിച്ച് തിരച്ചിൽ തുടരുകയാണെന്ന് മുഖ്യമന്ത്രി പറഞ്ഞു. കാലാവസ്ഥ പ്രതികൂലമായ സമയങ്ങളിലൊഴികെ തിരച്ചിൽ നിർത്തിവെച്ചിട്ടില്ലെന്നും ഡോർണിയർ വിമാനം, ഹെലികോപ്റ്റർ, സ്ക്രീനിങ് സംവിധാനങ്ങൾ, സ്കൂബ ഡൈവിങ് സംവിധാനങ്ങൾ എന്നിവ ഉപയോഗിക്കുന്നുണ്ടെന്നും അദ്ദേഹം വ്യക്തമാക്കി. സർക്കാർ ഉദാസീനത കാട്ടിയെന്ന ആരോപണവും സതീശൻ തള്ളി.
കുടുംബത്തിന് സർക്കാർ സാധ്യമായ എല്ലാ സഹായവും നൽകുമെന്നും നിയമപരമായോ ഇൻഷുറൻസുമായി ബന്ധപ്പെട്ടോ ഉള്ള തടസ്സങ്ങൾ ഉണ്ടെങ്കിൽ പരിഹരിക്കാൻ ഇടപെടുമെന്നും മുഖ്യമന്ത്രി അറിയിച്ചു.
ഗൗതം കൃഷ്ണയ്ക്കു പുറമെ ജൂലൈ 31ലെ വ്യത്യസ്ത മത്സ്യബന്ധന വള്ളം അപകടങ്ങളിൽ കാണാതായ ജോൺ, ഷിജിൻ എന്നിവർക്കായും തിരച്ചിൽ തുടരുകയാണ്. നീണ്ടകര, മുതലപ്പൊഴി, വിഴിഞ്ഞം തീരങ്ങളിലാണ് വിവിധ ഏജൻസികളുടെ നേതൃത്വത്തിൽ തിരച്ചിൽ നടക്കുന്നത്. ഇന്ത്യൻ നാവികസേനയും തീരദേശ പൊലീസും മറൈൻ എൻഫോഴ്സ്മെന്റ് വിഭാഗവും രക്ഷാപ്രവർത്തനത്തിൽ പങ്കെടുക്കുന്നുണ്ട്.
