ചെന്നൈ: സംഗീതസംവിധായകൻ എ.ആർ. റഹ്മാന്റെ മകനും ഗായകനുമായ എ.ആർ. അമീന് ചെന്നൈയിൽ വാഹനാപകടത്തിൽ നിസാര പരുക്ക്. തിങ്കളാഴ്ച പുലർച്ചെ ഗിണ്ടിയിലെ ഒളിമ്പിയ ടെക് പാർക്ക് സിഗ്നലിന് സമീപമാണ് അപകടമുണ്ടായത്.
സുഹൃത്തിനൊപ്പം കാറിൽ യാത്ര ചെയ്യുകയായിരുന്ന അമീന്റെ പോർഷെ മറ്റൊരു വാഹനവുമായി കൂട്ടിയിടിക്കുകയായിരുന്നു. അമീനും സുഹൃത്തിനും നിസാര പരുക്കേറ്റതിനെ തുടർന്ന് ആശുപത്രിയിൽ പ്രവേശിപ്പിച്ചു. ചികിത്സയ്ക്കുശേഷം ഇരുവരെയും ഡിസ്ചാർജ് ചെയ്തു. അപകടത്തിൽ മറ്റൊരു വാഹനത്തിലുണ്ടായിരുന്നയാൾക്കും പരുക്കേറ്റതായി റിപ്പോർട്ടുണ്ട്.
അഡയാർ ട്രാഫിക് ഇൻവെസ്റ്റിഗേഷൻ വിഭാഗം സംഭവത്തിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു. അപകടത്തിൽപ്പെട്ട രണ്ട് വാഹനങ്ങളും പൊലീസ് കസ്റ്റഡിയിലെടുത്തിട്ടുണ്ട്. അപകടത്തിന്റെ കൃത്യമായ കാരണം കണ്ടെത്താൻ പൊലീസ് അന്വേഷണം തുടരുകയാണ്.
അപകടസമയത്ത് അമീൻ ഗിണ്ടിയിലേക്ക് സഞ്ചരിക്കുകയായിരുന്നു എന്നാണ് പ്രാഥമിക വിവരം. മറ്റൊരു വാഹനം സൈഡ് റോഡിൽനിന്ന് പ്രധാന റോഡിലേക്ക് പ്രവേശിച്ചതിന് പിന്നാലെയാണ് കൂട്ടിയിടിയുണ്ടായതെന്നാണ് പൊലീസ് വൃത്തങ്ങളെ ഉദ്ധരിച്ചുള്ള റിപ്പോർട്ടുകൾ. എന്നാൽ അപകടത്തിന്റെ ഉത്തരവാദിത്തം സംബന്ധിച്ച് അന്തിമ നിഗമനത്തിലെത്തിയിട്ടില്ല.
എ.ആർ. റഹ്മാന്റെ മകനായ അമീൻ പിന്നണി ഗായകനായി പ്രവർത്തിക്കുന്നുണ്ട്. പിതാവിന്റെ സംഗീത പരിപാടികളിലും അദ്ദേഹം പങ്കെടുത്തിട്ടുണ്ട്.
