കാന്ബെറ: ഓസ്ട്രേലിയയിലെ ഫുഡ് ഡെലിവറി തൊഴിലാളികൾക്ക് ആശ്വാസമായി പുതിയ തൊഴിൽ നിയമങ്ങൾ പ്രാബല്യത്തിൽ വന്നു. ദീർഘകാലമായി അർഹമായ വേതനമോ, അസുഖ അവധിയോ, അടിസ്ഥാന തൊഴിൽ സുരക്ഷയോ ലഭിക്കാതെ പ്രയാസപ്പെട്ടിരുന്ന ഗിഗ് തൊഴിലാളികൾക്ക് വലിയ നേട്ടമാകുന്നതാണ് സർക്കാരിന്റെ പുതിയ തീരുമാനം. പുതിയ നിയമങ്ങൾ നടപ്പിലാകുന്നതോടെ Uber Eats, DoorDash തുടങ്ങിയ പ്ലാറ്റ്ഫോമുകളിൽ ജോലി ചെയ്യുന്ന ആയിരക്കണക്കിന് തൊഴിലാളികൾക്ക് ന്യായമായ വേതനവും സുരക്ഷിതമായ തൊഴിൽ അന്തരീക്ഷവും ഉറപ്പാക്കപ്പെടും.
ഓരോ തൊഴിലാളിക്കും മാന്യമായ വേതനവും അന്തസ്സും ലഭിക്കാൻ അർഹതയുണ്ടെന്നും, ദുർബലരായ തൊഴിലാളികൾ ചൂഷണം ചെയ്യപ്പെടുന്ന ഒരു കാലഘട്ടത്തിനാണ് ഈ നിയമനിർമ്മാണത്തിലൂടെ അന്ത്യം കുറിക്കുന്നതെന്നും ഓസ്ട്രേലിയൻ പ്രധാനമന്ത്രി ആന്റണി ആൽബനീസി വ്യക്തമാക്കി. പുതിയ പരിഷ്കരണങ്ങൾ വഴി ഡെലിവറി ജീവനക്കാർക്ക് അവരുടെ തൊഴിൽ സമയത്തിന് ന്യായമായ പ്രതിഫലം ഉറപ്പാകുന്നതിനൊപ്പം, അസുഖം മൂലം ജോലിക്ക് ഹാജരാകാൻ കഴിയാത്ത ദിവസങ്ങളിൽ സാമ്പത്തിക സഹായം ലഭിക്കുമെന്നും സർക്കാർ വൃത്തങ്ങൾ അറിയിച്ചു.
അതേസമയം, ഫുഡ് ഡെലിവറി സേവനങ്ങൾ ഉപയോഗിക്കുന്ന ഹോട്ടൽ ഉടമകൾക്ക് പുതിയ നിയമങ്ങൾ സംബന്ധിച്ച് പ്രത്യേക അറിയിപ്പ് നൽകിയിട്ടുണ്ട്. തൊഴിലാളികൾക്ക് മിനിമം വേതന വ്യവസ്ഥകളും തൊഴിൽ സംരക്ഷണവും നടപ്പിലാക്കുന്ന സാഹചര്യത്തിൽ, വരും ദിവസങ്ങളിൽ ഡെലിവറി ചാർജുകളിൽ ചെറിയ വർദ്ധനവ് ഉണ്ടായേക്കാം. പുതിയ മാറ്റങ്ങൾ തങ്ങളുടെ ബിസിനസ്സിനെ എങ്ങനെ ബാധിക്കുമെന്നും, ഡെലിവറി പങ്കാളികളുമായുള്ള കരാറുകൾ എപ്രകാരം പുതുക്കണമെന്നും വ്യക്തത വരുത്താൻ ഹോട്ടൽ ഉടമകൾ ബന്ധപ്പെട്ട പ്ലാറ്റ്ഫോമുകളുമായി ഉടൻ തന്നെ ബന്ധപ്പെടേണ്ടതാണ്.
