കോട്ടയം: ജില്ലാ ഭരണകൂടവും ജില്ലാ ടൂറിസം പ്രമോഷൻ കൗൺസിലും (ഡി.ടി.പി.സി) കോട്ടയം നഗരസഭയും സംയുക്തമായി സംഘടിപ്പിക്കുന്ന ജില്ലാതല ഓണാഘോഷ പരിപാടികൾക്ക് തിരുനക്കര മൈതാനത്ത് തുടക്കമാകുന്നു. ഓഗസ്റ്റ് 24 മുതൽ 28 വരെ വിപുലമായ പരിപാടികളോടെയാണ് ഓണാഘോഷം അരങ്ങേറുന്നത്. ഓഗസ്റ്റ് 24 വൈകുന്നേരം 4.30-ന് തിരുനക്കര മൈതാനത്ത് നടക്കുന്ന ഔദ്യോഗിക ഉദ്ഘാടന സമ്മേളനം നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. ജലവിഭവ, ഭവന നിർമ്മാണ വകുപ്പ് മന്ത്രി മോൻസ് ജോസഫ് ചടങ്ങിൽ അധ്യക്ഷത വഹിക്കും.
വൈകുന്നേരം 3.30-ന് സി.എം.എസ് കോളേജ് പരിസരത്തുനിന്ന് ആരംഭിച്ച് തിരുനക്കര മൈതാനത്ത് സമാപിക്കുന്ന സാംസ്കാരിക ഘോഷയാത്രയോടെയാണ് ആഘോഷങ്ങൾക്ക് തുടക്കമാകുന്നത്. തുടർന്ന് 4 മണിക്ക് നിലാംബരി ഓർക്കസ്ട്ര അവതരിപ്പിക്കുന്ന മ്യൂസിക്കൽ ഫ്യൂഷൻ (നാദോപാസന) നടക്കും. ഉദ്ഘാടന സമ്മേളനത്തിൽ ജില്ലാ കളക്ടറും ഡി.ടി.പി.സി ചെയർപേഴ്സണുമായ ചേതൻകുമാർ മീണ ഐ.എ.എസ് സ്വാഗതവും, ഡി.ടി.പി.സി സെക്രട്ടറി ആതിര സണ്ണി കൃതജ്ഞതയും രേഖപ്പെടുത്തും. കോട്ടയം എം.പി അഡ്വ. കെ. ഫ്രാൻസിസ് ജോർജ് ഓണസന്ദേശം നൽകും. എം.പിമാരായ കൊടിക്കുന്നിൽ സുരേഷ്, ആന്റോ ആന്റണി, ജോസ് കെ. മാണി എന്നിവർ മുഖ്യാതിഥികളായി പങ്കെടുക്കും.
എം.എൽ.എമാരായ മാണി സി. കാപ്പൻ, ചാണ്ടി ഉമ്മൻ, നാട്ടകം സുരേഷ്, കെ. ബിജുമോൻ, എൽദോ സെബാസ്റ്റ്യൻ, റോണി കെ. ബേബി, വിനു ജോബ്, ജില്ലാ പഞ്ചായത്ത് പ്രസിഡന്റ് ജോസഫി ഫിലിപ്പ്, മുനിസിപ്പൽ ചെയർപേഴ്സൺ എം.പി. സന്തോഷ്കുമാർ, ജില്ലാ പോലീസ് മേധാവി കെ.എം. സാബു മാത്യു, എ.ഡി.എം സോളി ആന്റണി, ആർ.ഡി.ഒ നിജു കുര്യൻ, തഹസിൽദാർ സിറിൽ ശങ്കരശ്ശേരി ജോർജ്ജ്, നഗരസഭാംഗം എസ്. ഗോപകുമാർ, വിവിധ രാഷ്ട്രീയ പാർട്ടി പ്രതിനിധികളായ നാട്ടകം സുരേഷ്, ടി.ആർ. രഘുനാഥൻ, അസീസ് ബഡായി, അഡ്വ. മൈക്കിൾ ജെയിംസ്, അഡ്വ. സന്തോഷ് കുമാർ, ലിജിൻ ലാൽ, അരുൺ ടി.സി, അനി ചന്ദ്രൻ, ടോമി മേച്ചേരി, സണ്ണി തെക്കേടം, റോണി കുരുവിള, നിബു എബ്രഹാം എന്നിവർ ആശംസകൾ അർപ്പിക്കും. ഉദ്ഘാടനത്തിന് ശേഷം വൈകുന്നേരം കോട്ടയം കമ്മ്യൂണിക്കേഷൻസ് അവതരിപ്പിക്കുന്ന ഗാനമേള അരങ്ങേറും.
ഓഗസ്റ്റ് 25 ചൊവ്വാഴ്ച വൈകുന്നേരം 5 മണിക്ക് വിവിധ മേഖലകളിലെ പ്രതിഭകളെ ആദരിക്കുന്ന ‘പ്രതിഭാസംഗമം’ സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. നാട്ടകം സുരേഷ് എം.എൽ.എ അധ്യക്ഷത വഹിക്കും. മികച്ച പിന്നണി ഗായികയ്ക്കുള്ള ദേശീയ അവാർഡ് കരസ്ഥമാക്കിയ കോട്ടയത്തിന്റെ അനുഗ്രഹീത കലാകാരി വൈക്കം വിജയലക്ഷ്മിയെ ചടങ്ങിൽ ആദരിക്കും. തുടർന്ന് വൈക്കം വിജയലക്ഷ്മി നയിക്കുന്ന ഗാനമേളയും നടക്കും.
ഓഗസ്റ്റ് 26 ബുധനാഴ്ച വൈകുന്നേരം 4 മണിക്ക് മാരായമുട്ടം ജോണി അവതരിപ്പിക്കുന്ന ‘കണ്ണകി’ കഥാപ്രസംഗം നടക്കും. 5.30-ന് ജില്ലയിലെ കലാകാരന്മാർ അണിനിരക്കുന്ന വിവിധ പരിപാടികളും ദർശന കൾച്ചറൽ സെന്ററും വേഫെറസ് മ്യൂസിക് ക്ലബ്ബും സംയുക്തമായി സംഘടിപ്പിക്കുന്ന ‘ആർക്കും പാടാം’ സംഗീതപരിപാടിയും 6.30-ന് കുക്കുമ്പർ സിറ്റി കോട്ടയം അവതരിപ്പിക്കുന്ന മ്യൂസിക് ബാൻഡും അരങ്ങേറും.
