ന്യൂഡൽഹി: പാലക്കാട് റെയിൽവേ ഡിവിഷന്റെ പരിധിയിൽനിന്ന് മംഗളൂരു മേഖലയെ മാറ്റി ദക്ഷിണ പശ്ചിമ റെയിൽവേയുടെ മൈസൂരു ഡിവിഷനിൽ ഉൾപ്പെടുത്താനുള്ള തീരുമാനത്തിൽ നിന്ന് പിന്നോട്ടില്ലെന്ന് കേന്ദ്ര റെയിൽവേ സഹമന്ത്രി വി. സോമണ്ണ. തീരുമാനം വിശദമായ ആലോചനകൾക്ക് ശേഷമാണ് എടുത്തതെന്നും കേരളത്തിന്റെ സമ്മർദത്തിന് വഴങ്ങി ഇത് പിൻവലിക്കില്ലെന്നും മന്ത്രി വ്യക്തമാക്കി.
തീരുമാനത്തിന് മുന്നോടിയായി മൂന്ന് റെയിൽവേ ജനറൽ മാനേജർമാരുമായി ഏകദേശം 40 മണിക്കൂർ ചർച്ച നടത്തിയതായി സോമണ്ണ പറഞ്ഞു. കൊങ്കൺ റെയിൽവേ, സൗത്ത് സെൻട്രൽ റെയിൽവേ, സൗത്ത് വെസ്റ്റേൺ റെയിൽവേ ജനറൽ മാനേജർമാരുമായാണ് ചർച്ചകൾ നടത്തിയതെന്ന് അദ്ദേഹം വ്യക്തമാക്കി. ഉഡുപ്പി-ചിക്കമഗളൂരു എംപി കോട്ട ശ്രീനിവാസ് പൂജാരിക്ക് നൽകിയ മറുപടിയിലാണ് കേന്ദ്രമന്ത്രിയുടെ നിലപാട്.
മംഗളൂരുവിൽ നിന്ന് മൈസൂരുവിലേക്കുള്ള ദൂരം ഏകദേശം 100 കിലോമീറ്റർ മാത്രമാണെന്നും മംഗളൂരുവിൽ നിന്ന് പാലക്കാട് ഡിവിഷൻ ആസ്ഥാനത്തേക്ക് ഏകദേശം 350 കിലോമീറ്റർ ദൂരമുണ്ടെന്നും സോമണ്ണ ചൂണ്ടിക്കാട്ടി. ഭരണപരമായ പുനഃസംഘടനയ്ക്ക് പിന്നിലെ പ്രധാന കാരണങ്ങളിലൊന്നായി കേന്ദ്രം ഈ ദൂരവ്യത്യാസമാണ് വിശദീകരിക്കുന്നത്.
അതേസമയം, മംഗളൂരു കേന്ദ്രീകരിച്ച് പുതിയ റെയിൽവേ ഡിവിഷൻ രൂപീകരിക്കുന്നതിനുള്ള സാധ്യതയും മന്ത്രി തള്ളിയില്ല. ഇക്കാര്യത്തിൽ ഒരു വർഷത്തിന് ശേഷം മറുപടി നൽകാമെന്നാണ് അദ്ദേഹം വ്യക്തമാക്കിയത്. മംഗളൂരു തുറമുഖം കർണാടകയുടെ ആവശ്യമായതിനാലാണ് മേഖലയെ മൈസൂരു ഡിവിഷനിലേക്ക് മാറ്റുന്നതെന്നും മന്ത്രി പറഞ്ഞു.
റെയിൽവേ ബോർഡിന്റെ പുനഃസംഘടനാ തീരുമാനം 2026 ഒക്ടോബർ 1 മുതൽ പ്രാബല്യത്തിൽ വരും. മംഗളൂരു മേഖലയിലെ ഉളളാൾ വരെയുള്ള ഭാഗം, ഉളളാൾ സ്റ്റേഷൻ ഉൾപ്പെടെ, മൈസൂരു ഡിവിഷനിലേക്ക് മാറും. ഇതോടെ ദക്ഷിണ പശ്ചിമ റെയിൽവേയും ദക്ഷിണ റെയിൽവേയും തമ്മിലുള്ള ഇന്റർചേഞ്ച് പോയിന്റ് പാദിലിൽ നിന്ന് ഉളളാളിലേക്ക് മാറും.
പാലക്കാട് ഡിവിഷന്റെ വരുമാനത്തിൽ മംഗളൂരു മേഖലയ്ക്കുള്ള വലിയ പങ്കാണ് കേരളത്തിൽ ആശങ്ക ഉയരാൻ പ്രധാന കാരണം. ഒരു റെയിൽവേ ഉദ്യോഗസ്ഥനെ ഉദ്ധരിച്ച് ദ ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്തത് പ്രകാരം, ഡിവിഷന്റെ ഏകദേശം ₹650 കോടിയുടെ ചരക്ക് വരുമാനത്തിന്റെ 90 ശതമാനത്തിലേറെയും മംഗളൂരു മേഖലയിൽ നിന്നാണ് ലഭിക്കുന്നത്. ഡിവിഷന്റെ ആകെ ഏകദേശം ₹1,650 കോടി വരുമാനത്തിന്റെ പകുതിയിലേറെയും ഈ മേഖലയിൽ നിന്നാണെന്നും റിപ്പോർട്ടിൽ പറയുന്നു.
പാലക്കാട് ഡിവിഷന്റെ പ്രവർത്തന അടിത്തറ ഇതോടെ കൂടുതൽ ചുരുങ്ങുമെന്നും പുതിയ ട്രെയിനുകൾ അനുവദിക്കുന്നതിലും പ്രത്യേക സർവീസുകൾ നടത്തുന്നതിലും ഇത് പ്രതിസന്ധി സൃഷ്ടിക്കാമെന്നുമുള്ള ആശങ്കകളും റെയിൽവേ ഉദ്യോഗസ്ഥർ പ്രകടിപ്പിച്ചിട്ടുണ്ട്.
അതേസമയം, കേരളത്തിലെ രാഷ്ട്രീയ നേതൃത്വവും വിവിധ സംഘടനകളും തീരുമാനത്തിനെതിരെ രംഗത്തെത്തിയിട്ടുണ്ട്. എന്നാൽ തീരുമാനം പുനഃപരിശോധിക്കില്ലെന്ന കേന്ദ്ര നിലപാട് വിഷയത്തിൽ കേരളവും കേന്ദ്രവും തമ്മിലുള്ള തർക്കം കൂടുതൽ രൂക്ഷമാക്കാനാണ് സാധ്യത.
