സ്റ്റോക്ക്ഹോം: സ്വീഡനിൽ ‘ഇസ്ലാമിസ’ത്തിന് യാതൊരു സ്ഥാനവുമില്ലെന്ന് പ്രഖ്യാപിച്ച് സ്വീഡിഷ് ഉപപ്രധാനമന്ത്രി എബ്ബ ബുഷ്. രാഷ്ട്രീയ ഇസ്ലാമിനെക്കുറിച്ച് ഔദ്യോഗിക തലത്തിൽ സമഗ്രമായ അന്വേഷണം നടത്താൻ സ്വീഡിഷ് സർക്കാർ തീരുമാനിച്ചതിന് പിന്നാലെയാണ് ഉപപ്രധാനമന്ത്രിയുടെ ശക്തമായ പ്രതികരണം.
സ്വാതന്ത്ര്യം, തുല്യത, ജനാധിപത്യം എന്നിവയെ തടസ്സപ്പെടുത്തുന്നതിനായി മതത്തെ ഉപയോഗിക്കാൻ അനുവദിക്കില്ലെന്ന് എബ്ബ ബുഷ് വ്യക്തമാക്കി. അത്തരം നീക്കങ്ങളെ നിഷ്കളങ്കതയോടെയല്ല, മറിച്ച് ശക്തമായ പ്രതിരോധത്തോടെയാണ് നേരിടേണ്ടതെന്നും അവർ കൂട്ടിച്ചേർത്തു.
സ്വീഡിഷ് സമൂഹത്തിലും അവിടുത്തെ വിവിധ സ്ഥാപനങ്ങളിലും രാഷ്ട്രീയ ഇസ്ലാം ചെലുത്തുന്ന സ്വാധീനവും പ്രത്യാഘാതങ്ങളും സംബന്ധിച്ചാണ് സർക്കാർ പ്രഖ്യാപിച്ച അന്വേഷണ കമ്മീഷൻ പരിശോധിക്കുക. രാജ്യത്തിന്റെ ജനാധിപത്യ മൂല്യങ്ങൾക്ക് വിരുദ്ധമായ ആശയങ്ങളെ പ്രതിരോധിക്കുന്നതിന്റെ ഭാഗമായാണ് പുതിയ നീക്കമെന്ന് സർക്കാർ വൃത്തങ്ങൾ വ്യക്തമാക്കി.
