കാൻബറ: പത്ത് ദശലക്ഷത്തിലധികം ഡോളർ വിപണിമൂല്യം വരുന്ന ലഹരിക്കടത്ത് ശൃംഖലയെ ലക്ഷ്യമിട്ട് നടത്തിയ ദീർഘകാല അന്വേഷണത്തിനൊടുവിൽ ഏഴുപേർക്കെതിരെ കേസെടുത്തതായി എ.സി.ടി പോലീസ് അറിയിച്ചു. പുതുതായി രൂപീകരിച്ച ബാൻഡിഡോസ് ഒ.എം.സി.ജി (Bandidos OMCG) കാൻബറ ചാപ്റ്ററുമായി ബന്ധപ്പെട്ട് പ്രവർത്തിച്ചിരുന്ന ക്രിമിനൽ സംഘമാണ് പോലീസ് വലയിലായത്.
70 കിലോഗ്രാമിലധികം കൊക്കെയ്നാണ് ഈ ശൃംഖല വഴി കടത്തിയതെന്ന് പോലീസ് വ്യക്തമാക്കി. അന്വേഷണത്തിന്റെ ഭാഗമായി ഏഴ് കേന്ദ്രങ്ങളിലും രണ്ട് വാഹനങ്ങളിലും അധികൃതർ പരിശോധന നടത്തി. പരിശോധനയിൽ ഏകദേശം 4.6 കിലോഗ്രാം കൊക്കെയ്നും 6,00,000 ഡോളർ പണവും പിടിച്ചെടുത്തു. ഇതിനുപുറമെ രൂപമാറ്റം വരുത്തിയ ഗ്ലോക്ക് 19 തോക്ക്, എൻക്രിപ്റ്റ് ചെയ്ത ഉപകരണങ്ങൾ, നാല് വാഹനങ്ങൾ എന്നിവയും പോലീസ് കസ്റ്റഡിയിലെടുത്തു. ടേസറുകൾ, ബാറ്റണുകൾ, നക്കിൾ ഡസ്റ്ററുകൾ, സ്റ്റിറോയിഡുകൾ എന്നിവയും റെയ്ഡിൽ കണ്ടെത്തിയിട്ടുണ്ട്.
കേസിലെ തെളിവുകൾ അടങ്ങിയ ഇലക്ട്രോണിക് ഉപകരണം ഒളിപ്പിക്കാൻ ശ്രമിച്ച മറ്റൊരു വ്യക്തിക്കെതിരെയും പോലീസ് കേസെടുത്തിട്ടുണ്ട്. നിയമവിരുദ്ധ മോട്ടോർസൈക്കിൾ സംഘങ്ങൾ ഭീഷണിയും അക്രമവും ലഹരിമരുന്ന് ഇടപാടുകളും വഴിയാണ് മറ്റ് കുറ്റകൃത്യങ്ങൾക്കുള്ള പണം കണ്ടെത്തുന്നത് എന്ന് പോലീസ് മുന്നറിയിപ്പ് നൽകി.
