കാൻബറ: പ്രധാനമന്ത്രി ആന്റണി ആൽബനീസ് മെറിക്വിൽ ഗോൾഫ് ക്ലബ്ബിലെ ഓണററി അംഗത്വം പാർലമെന്ററി രജിസ്റ്ററിൽ വെളിപ്പെടുത്താതിരുന്നതും, തുടർന്ന് ക്ലബ്ബിന് വൻ തുകയുടെ സർക്കാർ ഗ്രാന്റ് അനുവദിച്ചതും ഓസ്ട്രേലിയയിൽ വിവാദമാകുന്നു. ക്ഷണിക്കപ്പെട്ടവർക്ക് മാത്രമായി ഏർപ്പെടുത്തിയ ഫെഡറൽ ഗ്രാന്റ് പദ്ധതിയിലൂടെ 6.05 ദശലക്ഷം ഡോളറാണ് നികുതിപ്പണത്തിൽ നിന്ന് ക്ലബ്ബിന് അനുവദിച്ചത്.
ഈ ഗ്രാന്റ് ലഭിക്കാൻ ക്ഷണിക്കപ്പെട്ട ഏക ഗോൾഫ് ക്ലബ് മെറിക്വിൽ ഗോൾഫ് ക്ലബ്ബ് മാത്രമായിരുന്നു. ക്ലബ്ബ് ഹൗസിന്റെ വിപുലമായ നവീകരണത്തിനായാണ് ഈ ഫണ്ട് വിനിയോഗിക്കുന്നത്. എന്നാൽ, ഇത്തരമൊരു ഓണററി അംഗത്വത്തെക്കുറിച്ച് തനിക്ക് അറിവില്ലായിരുന്നുവെന്നും വർഷങ്ങളായി ഈ ക്ലബ്ബ് ഹൗസ് സന്ദർശിച്ചിട്ടില്ലെന്നുമാണ് ആൽബനീസിന്റെ വിശദീകരണം. പ്രധാനമന്ത്രിയല്ല, താനാണ് ഗ്രാന്റ് അനുവദിച്ചതെന്ന് ഇൻഫ്രാസ്ട്രക്ചർ മന്ത്രി കാതറിൻ കിംഗും വ്യക്തമാക്കി.
അതേസമയം, 560 ദശലക്ഷം ഡോളറിന്റെ ഈ വിപുലമായ ഗ്രാന്റ് പദ്ധതി ഭരണകക്ഷിയായ ലേബർ പാർട്ടിയുടെ സുരക്ഷിത മണ്ഡലങ്ങൾക്കും അവർ ജയസാധ്യത കൽപ്പിച്ചിരുന്ന മണ്ഡലങ്ങൾക്കും വഴിവിട്ട രീതിയിൽ മുൻഗണന നൽകിയെന്ന രാഷ്ട്രീയ ആരോപണങ്ങൾക്ക് ഇടയാക്കിയിട്ടുണ്ട്. ഗ്രാന്റിനായി പദ്ധതികൾ തെരഞ്ഞെടുത്ത മാനദണ്ഡങ്ങളെക്കുറിച്ചോ പട്ടിക തയ്യാറാക്കിയ രീതിയെക്കുറിച്ചോ സർക്കാർ ഇതുവരെ ഔദ്യോഗിക വിശദീകരണം നൽകിയിട്ടില്ല. പൊതുപണം വൻതോതിൽ വിതരണം ചെയ്യുമ്പോൾ പൂർണമായ സുതാര്യതയും ഉത്തരവാദിത്തവും ഉറപ്പാക്കണമെന്ന ആവശ്യവും ഇതോടെ ശക്തമായിട്ടുണ്ട്.
