വാഷിങ്ടൺ: യെമനിലെ ഇറാൻ അനുകൂല ഹൂതി വിമതർക്കെതിരെ യുഎസ് സൈനിക ആക്രമണം നടത്തണമെന്ന സൗദി കിരീടാവകാശി മുഹമ്മദ് ബിൻ സൽമാന്റെ ആവശ്യം പ്രസിഡന്റ് ഡോണൾഡ് ട്രംപ് നിരസിച്ചതായി റിപ്പോർട്ട്. വ്യാഴാഴ്ച രണ്ട് തവണ കിരീടാവകാശി ട്രംപുമായി ഫോണിൽ സംസാരിച്ച് ഹൂതികൾക്കെതിരെ നേരിട്ടുള്ള ആക്രമണം നടത്തണമെന്ന് ആവശ്യപ്പെട്ടതായാണ് ആക്സിയോസ് റിപ്പോർട്ട് ചെയ്തത്.
ഹൂതികൾ യെമനിലെ തന്ത്രപ്രധാനമായ മോഖ തുറമുഖ നഗരം പിടിച്ചെടുത്തതും ബാബ് അൽ-മന്ദബ് കടലിടുക്കിന് സമീപത്തേക്ക് മുന്നേറിയതുമാണ് സൗദിയുടെ ആശങ്കയ്ക്ക് പ്രധാന കാരണം. ആഗോള വ്യാപാരത്തിനും സൗദിയുടെ എണ്ണ കയറ്റുമതിക്കും നിർണായകമായ സമുദ്രമാർഗമാണ് ബാബ് അൽ-മന്ദബ്.
ഹൂതികൾക്കെതിരെ നേരിട്ട് സൈനിക നടപടി സ്വീകരിക്കാൻ നിലവിൽ പദ്ധതിയില്ലെന്നാണ് യുഎസ് ഉദ്യോഗസ്ഥരെ ഉദ്ധരിച്ചുള്ള റിപ്പോർട്ട്. ഇറാനെതിരായ സൈനിക നടപടികളിലും ഹോർമുസ് കടലിടുക്കിന്റെ സുരക്ഷയിലും യുഎസ് സൈനികശേഷി കേന്ദ്രീകരിക്കാനാണ് ട്രംപ് നിർദേശം നൽകിയിരിക്കുന്നതെന്നും റിപ്പോർട്ടിൽ പറയുന്നു. അതേസമയം, സൗദിക്ക് ഇന്റലിജൻസ് വിവരങ്ങളും ലക്ഷ്യനിർണയ സഹായവും നൽകുന്നത് ഉൾപ്പെടെയുള്ള പിന്തുണ യുഎസ് വർധിപ്പിക്കുന്നുണ്ട്.
ഹൂതികളുടെ മുന്നേറ്റത്തെ തുടർന്ന് മേഖലയിലെ സംഘർഷം രൂക്ഷമായിരിക്കുകയാണ്. സൗദി അറേബ്യ ഹൂതി നിയന്ത്രണത്തിലുള്ള യെമൻ പ്രദേശങ്ങളിൽ വ്യോമാക്രമണം നടത്തിയിട്ടുണ്ട്. അതേസമയം, സൗദിക്കെതിരായ ഹൂതി ആക്രമണങ്ങളെ ഇന്ത്യ സെപ്റ്റംബർ 9ന് അപലപിച്ചിരുന്നു.
അമേരിക്കൻ ആക്രമണവുമായി ബന്ധപ്പെട്ട സൗദിയുടെ ആവശ്യം സംബന്ധിച്ച് വൈറ്റ് ഹൗസും വാഷിങ്ടണിലെ സൗദി എംബസിയും ഉടൻ ഔദ്യോഗിക പ്രതികരണം നൽകിയിട്ടില്ല.
