തിരുവനന്തപുരം: മാസപ്പടി, ഹവാല ഇടപാടുകൾ സംബന്ധിച്ച് പ്രതിപക്ഷ നേതാവ് പിണറായി വിജയൻ, മുൻ മന്ത്രി പി.എ. മുഹമ്മദ് റിയാസ്, ടി. വീണ എന്നിവർക്കെതിരായ ആരോപണങ്ങൾ അന്വേഷിക്കാൻ ക്രൈംബ്രാഞ്ച് ഒമ്പതംഗ പ്രത്യേക അന്വേഷണസംഘം (എസ്ഐടി) രൂപീകരിച്ചു.
ക്രൈംബ്രാഞ്ച് എഡിജിപി എച്ച്. വെങ്കിടേഷിന്റെ മേൽനോട്ടത്തിൽ എസ്പി വിക്രമനാണ് അന്വേഷണത്തിന് നേതൃത്വം നൽകുക. മൂന്ന് ഡിവൈഎസ്പിമാരും അഞ്ച് സിഐമാരും ഉൾപ്പെടുന്നതാണ് ഒമ്പതംഗ സംഘം. ഫോൺ രേഖകൾ ഉൾപ്പെടെയുള്ള സൈബർ തെളിവുകൾ പരിശോധിക്കാൻ സൈബർ സെല്ലിലെ വിദഗ്ധ ഉദ്യോഗസ്ഥരെയും അന്വേഷണസംഘത്തിൽ ഉൾപ്പെടുത്താൻ നിർദേശം നൽകിയിട്ടുണ്ട്.
എൻഫോഴ്സ്മെന്റ് ഡയറക്ടറേറ്റ് (ഇഡി) സംസ്ഥാന പോലീസ് മേധാവിക്ക് നൽകിയ കത്തിന്റെ അടിസ്ഥാനത്തിലാണ് അന്വേഷണം. സിഎംആർഎൽ–എക്സാലോജിക് ഇടപാടുകളുമായി ബന്ധപ്പെട്ട മാസപ്പടി ആരോപണങ്ങളും ദുബായിലേക്കുള്ളതായി ആരോപിക്കപ്പെടുന്ന ഹവാല ഇടപാടുകളുമാണ് പ്രധാനമായും പരിശോധിക്കുക.
നിലവിൽ കേസ് രജിസ്റ്റർ ചെയ്തിട്ടില്ല. പ്രാഥമിക അന്വേഷണത്തിൽ ആരോപണങ്ങൾക്ക് തെളിവുണ്ടെന്ന് കണ്ടെത്തിയാൽ കേസ് രജിസ്റ്റർ ചെയ്ത് തുടർനടപടി സ്വീകരിക്കാനാണ് തീരുമാനം. അന്വേഷണവുമായി ബന്ധപ്പെട്ട് ഇഡിയിൽനിന്ന് ലഭിച്ച രേഖകളും വിവരങ്ങളും പരിശോധിക്കുമെന്നും റിപ്പോർട്ടുകളുണ്ട്.
