കണ്ണൂർ: വടക്കൻ മലബാറിലെ യാത്രക്കാർ നേരിടുന്ന രാത്രികാല യാത്രാദുരിതത്തിന് പരിഹാരമായി ആലപ്പുഴ–കണ്ണൂർ എക്സിക്യൂട്ടീവ് എക്സ്പ്രസ് കാസർകോട് വരെ നീട്ടാൻ ധാരണ. കേന്ദ്ര റെയിൽവേ മന്ത്രി അശ്വിനി വൈഷ്ണവുമായി നടത്തിയ ചർച്ചയിലാണ് സർവീസ് നീട്ടുന്നതുമായി ബന്ധപ്പെട്ട് അനുകൂല തീരുമാനമുണ്ടായത്. നിലവിൽ കണ്ണൂരിൽ യാത്ര അവസാനിപ്പിക്കുന്ന ട്രെയിൻ കാസർകോട് വരെ സർവീസ് നടത്തുന്നതോടെ പയ്യന്നൂർ, നീലേശ്വരം, കാഞ്ഞങ്ങാട്, കാസർകോട് ഭാഗങ്ങളിലേക്കുള്ള യാത്രക്കാർക്ക് ഇത് വലിയ ആശ്വാസമാകും.
കണ്ണൂരിൽ രാത്രി വൈകിയെത്തുന്ന യാത്രക്കാർക്ക് കാസർകോട് ഭാഗത്തേക്ക് തുടർയാത്രയ്ക്ക് മതിയായ ട്രെയിനുകളോ പൊതുഗതാഗത സൗകര്യങ്ങളോ ഇല്ലാത്തത് വലിയ ബുദ്ധിമുട്ടാണ് സൃഷ്ടിക്കുന്നത്. ബസുകൾ ലഭിക്കാതെ സ്ത്രീകൾ, കുട്ടികൾ, രോഗികൾ, മുതിർന്ന പൗരന്മാർ എന്നിവരടങ്ങുന്ന യാത്രക്കാർ റെയിൽവേ സ്റ്റേഷനിൽ മണിക്കൂറുകളോളം കാത്തിരിക്കേണ്ടി വരാറുണ്ട്. ട്രെയിൻ നീട്ടുന്നതോടെ ഈ ദുരിതത്തിന് വലിയൊരു പരിധി വരെ പരിഹാരമാകും.
സംസ്ഥാനത്തെ റെയിൽവേ പാതകളിൽ രൂക്ഷമായ യാത്രാതിരക്ക് തുടരുന്ന സാഹചര്യത്തിൽ, ഈ തീരുമാനം വടക്കൻ മലബാറിലെ നിത്യയാത്രക്കാർക്കും വിദ്യാർത്ഥികൾക്കും സഹായകരമാകും. സർവീസ് നീട്ടുന്നതിന്റെ പ്രാബല്യത്തീയതി, സ്റ്റോപ്പുകൾ, പുതുക്കിയ സമയക്രമം എന്നിവ സംബന്ധിച്ച ഔദ്യോഗിക ഉത്തരവ് റെയിൽവേ ഉടൻ പുറപ്പെടുവിക്കും. അതേസമയം, ജനറൽ കോച്ചുകളിലെ അനിയന്ത്രിതമായ തിരക്ക് പരിഹരിക്കാൻ കൂടുതൽ കോച്ചുകളോ പുതിയ സർവീസുകളോ അനുവദിക്കണമെന്ന ആവശ്യവും ശക്തമാണ്.
റിപ്പോര്‍ട്ട്: വി. രാജേഷ് മോഹന്‍ റാവു
ധര്‍മ്മടം തലശ്ശേരി
