വാഷിങ്ടൺ: നൈജീരിയയിൽ ക്രൈസ്തവർക്കെതിരായ ആക്രമണങ്ങളും മതപരമായ അക്രമങ്ങളും തുടരുന്ന സാഹചര്യത്തിൽ രാജ്യത്തിനെതിരായ സമ്മർദം ശക്തമാക്കണമെന്ന് യുഎസ് റിപ്പബ്ലിക്കൻ പ്രതിനിധികൾ. ക്രൈസ്തവ സമൂഹങ്ങളുടെ സുരക്ഷ ഉറപ്പാക്കുന്നതിൽ നൈജീരിയൻ സർക്കാർ കൂടുതൽ നടപടികൾ സ്വീകരിക്കണമെന്നും അക്രമികൾക്കെതിരെ കർശന നടപടി വേണമെന്നും യുഎസ് ജനപ്രതിനിധി സഭയുടെ വിദേശകാര്യ സമിതിയുടെ ആഫ്രിക്ക ഉപസമിതി യോഗത്തിൽ പ്രതിനിധികൾ ആവശ്യപ്പെട്ടു.
നവംബർ 12-ന് നടന്ന ഹിയറിങ്ങിൽ നൈജീരിയയിലെ സുരക്ഷാ സാഹചര്യം വിലയിരുത്തി. ന്യൂജേഴ്‌സിയിൽ നിന്നുള്ള റിപ്പബ്ലിക്കൻ പ്രതിനിധി ക്രിസ് സ്മിത്തിന്റെ അധ്യക്ഷതയിലായിരുന്നു യോഗം. യുഎസ് സ്റ്റേറ്റ് ഡിപ്പാർട്ട്‌മെന്റിലെ ആഫ്രിക്കൻ കാര്യങ്ങളുടെ അസിസ്റ്റന്റ് സെക്രട്ടറി ഫ്രാങ്ക് ഗാർഷ്യ, ജനാധിപത്യം, മനുഷ്യാവകാശം, തൊഴിൽ മേഖലകളുടെ ചുമതലയുള്ള അസിസ്റ്റന്റ് സെക്രട്ടറി റൈലി ബാൺസ് എന്നിവർ യോഗത്തിൽ വിശദീകരണം നൽകി.
നൈജീരിയയിലെ ക്രൈസ്തവ സമൂഹങ്ങൾക്കെതിരായ അക്രമം അവസാനിച്ചിട്ടില്ലെന്ന് ഫ്രാങ്ക് ഗാർഷ്യ വ്യക്തമാക്കി. അക്രമങ്ങൾ തടയാനും കുറ്റവാളികളെ നിയമത്തിനു മുന്നിൽ കൊണ്ടുവരാനും നൈജീരിയൻ അധികൃതരുമായി യുഎസ് സഹകരിക്കുന്നുണ്ട്. സുരക്ഷാസേനയുടെ വിന്യാസം വർധിപ്പിക്കുക, ആക്രമണ മുന്നറിയിപ്പുകളിൽ വേഗത്തിൽ പ്രതികരിക്കുക, അക്രമികൾക്കെതിരായ അന്വേഷണം ശക്തമാക്കുക തുടങ്ങിയ നടപടികൾക്ക് മുൻഗണന നൽകുന്നുണ്ടെന്നും അദ്ദേഹം പറഞ്ഞു. എന്നാൽ ഇതുവരെയുള്ള പുരോഗതി തൃപ്തികരമല്ലെന്നും ഗാർഷ്യ കൂട്ടിച്ചേർത്തു.
ക്രൈസ്തവർക്കെതിരായ അതിക്രമങ്ങൾ ആശങ്കാജനകമാണെന്ന് റൈലി ബാൺസും ചൂണ്ടിക്കാട്ടി. ഫുലാനി സായുധസംഘങ്ങളുടെ ആക്രമണങ്ങളിൽ മതപരമായ ലക്ഷ്യങ്ങൾ ഉൾപ്പെടുന്നുണ്ടെന്നും ക്രൈസ്തവരെ ലക്ഷ്യമിട്ട് കൊലപ്പെടുത്തുകയും തട്ടിക്കൊണ്ടുപോകുകയും ചെയ്യുന്നതായി ഇരകളുടെ മൊഴികളുണ്ടെന്നും അദ്ദേഹം പറഞ്ഞു. മതനിന്ദാ നിയമങ്ങൾ ദുരുപയോഗം ചെയ്യപ്പെടുന്ന സാഹചര്യം അവസാനിപ്പിക്കണമെന്നും നൈജീരിയൻ സർക്കാരിനോട് യുഎസ് ആവശ്യപ്പെട്ടിട്ടുണ്ടെന്നും വ്യക്തമാക്കി.
നൈജീരിയയിലെ നടപടികൾ പര്യാപ്തമല്ലെന്ന് റിപ്പബ്ലിക്കൻ പ്രതിനിധി റൈലി മൂർ വിമർശിച്ചു. ക്രൈസ്തവ സമൂഹങ്ങൾക്ക് സുരക്ഷയും നീതിയും ഉറപ്പാക്കുന്നതുവരെ നൈജീരിയയെ പ്രത്യേക ആശങ്കയുള്ള രാജ്യമായി (Country of Particular Concern – CPC) പ്രഖ്യാപിച്ച തീരുമാനം പിൻവലിക്കരുതെന്നും അദ്ദേഹം ആവശ്യപ്പെട്ടു. മതപരമായ അതിക്രമങ്ങൾ തടയുന്നതിൽ കൂടുതൽ ഉത്തരവാദിത്വം നൈജീരിയൻ സർക്കാർ ഏറ്റെടുക്കണമെന്ന് ബിൽ ഹൂയിസെംഗയും അഭിപ്രായപ്പെട്ടു.
2025-ൽ യുഎസ് പ്രസിഡന്റ് ഡോണൾഡ് ട്രംപ് നൈജീരിയയെ മതസ്വാതന്ത്ര്യ ലംഘനങ്ങൾ നടക്കുന്ന പ്രത്യേക ആശങ്കയുള്ള രാജ്യമായി വീണ്ടും പ്രഖ്യാപിച്ചിരുന്നു. ഇതിനു പിന്നാലെ ഇരുരാജ്യങ്ങളും സുരക്ഷാ സഹകരണം ശക്തമാക്കുകയും സംയുക്ത പ്രവർത്തകസമിതി രൂപീകരിക്കുകയും ചെയ്തു. എന്നാൽ ആക്രമണങ്ങൾ തുടരുകയാണെന്നാണ് യുഎസ് ഉദ്യോഗസ്ഥരുടെ വിലയിരുത്തൽ.
അതേസമയം, നൈജീരിയയിലെ അക്രമങ്ങളെ ക്രൈസ്തവർക്കെതിരായ മതപീഡനമായി മാത്രം വിശേഷിപ്പിക്കുന്നതിനെ നൈജീരിയൻ സർക്കാർ അംഗീകരിക്കുന്നില്ല. രാജ്യത്ത് ഭീകരവാദം, സായുധസംഘങ്ങളുടെ ആക്രമണം, കർഷക-കന്നുകാലി വളർത്തൽ വിഭാഗങ്ങൾ തമ്മിലുള്ള സംഘർഷം, തട്ടിക്കൊണ്ടുപോകൽ തുടങ്ങിയ സുരക്ഷാ പ്രശ്നങ്ങളാണ് നിലനിൽക്കുന്നതെന്നാണ് നൈജീരിയയുടെ നിലപാട്. മതസ്വാതന്ത്ര്യവുമായി ബന്ധപ്പെട്ട യുഎസ് വിമർശനങ്ങൾ തെറ്റായ വിവരങ്ങളുടെ അടിസ്ഥാനത്തിലുള്ളതാണെന്നും രാജ്യം നേരത്തെ പ്രതികരിച്ചിരുന്നു.
