ഇടുക്കി: മുരശ് ചുഴലിക്കാറ്റിനെത്തുടർന്ന് തെലങ്കാനയിലെ സെക്കന്തരാബാദിൽ ട്രെയിൻ സർവീസുകൾ റദ്ദാക്കിയതോടെ കുടുങ്ങിയ ഇടുക്കി സേനാപതി മാർ ബേസിൽ വൊക്കേഷനൽ ഹയർസെക്കൻഡറി സ്കൂളിലെ വിദ്യാർത്ഥികളും അധ്യാപകരും അടങ്ങുന്ന 91 അംഗ സംഘം നാടണയുന്നു. വിദ്യാർത്ഥികൾക്കായി റെയിൽവേ പ്രത്യേക ട്രെയിൻ സർവീസ് ഏർപ്പെടുത്തിയതോടെയാണ് മണിക്കൂറുകൾ നീണ്ട ആശങ്കകൾക്ക് വിരാമമായത്.
കഴിഞ്ഞ ഒക്ടോബർ 31-ന് വിനോദയാത്ര പുറപ്പെട്ട സംഘം ഇന്നലെ ഉച്ചയ്ക്ക് 2.30-ഓടെ കേരളത്തിലേക്ക് തിരികെ യാത്ര തിരിക്കാനിരിക്കെയാണ് പ്രതികൂല കാലാവസ്ഥയും ചുഴലിക്കാറ്റും കാരണം ട്രെയിൻ അപ്രതീക്ഷിതമായി റദ്ദാക്കിയത്. ഇതോടെ അധ്യാപകരും വിദ്യാർത്ഥികളും സെക്കന്തരാബാദ് റെയിൽവേ സ്റ്റേഷനിൽ കുടുങ്ങി പ്രതിസന്ധിയിലായി. തുടർന്ന് സംഘം ഉടുമ്പൻചോല എം.എൽ.എ സേനാപതി വേണുവിനെയും പ്രാദേശിക ജനപ്രതിനിധികളെയും വിവരമറിയിച്ച് സഹായം അഭ്യർത്ഥിക്കുകയായിരുന്നു.
വിഷയത്തിൽ അടിയന്തരമായി ഇടപെട്ട എം.എൽ.എ വിവരം മുഖ്യമന്ത്രിയുടെ ഓഫീസിന്റെ ശ്രദ്ധയിൽപ്പെടുത്തി. തുടർന്ന് മുഖ്യമന്ത്രിയുടെ ഓഫീസ് നോർക്ക (NORKA) അധികൃതരുമായി നേരിട്ട് ബന്ധപ്പെട്ട് റെയിൽവേ മന്ത്രാലയവുമായി ഏകോപനം നടത്തുകയും ഇവർക്കായി അടിയന്തര യാത്രാസൗകര്യം ഉറപ്പാക്കുകയുമായിരുന്നു. തുടർന്ന് ഇന്ന് പുലർച്ചെ 5:30-ന് അനുവദിച്ച പ്രത്യേക സ്പെഷ്യൽ ട്രെയിനിൽ സംഘം സുരക്ഷിതമായി നാട്ടിലേക്ക് മടക്കയാത്ര ആരംഭിച്ചു.
പ്രത്യേക ട്രെയിൻ നാളെ വൈകുന്നേരം 5:30-ഓടെ ആലുവ റെയിൽവേ സ്റ്റേഷനിൽ എത്തിച്ചേരും. കൃത്യസമയത്ത് ഉണ്ടായ സംസ്ഥാന സർക്കാരിന്റെയും ജനപ്രതിനിധികളുടെയും കാര്യക്ഷമമായ ഇടപെടലിൽ വലിയ ആശ്വാസത്തിലാണ് വിദ്യാർത്ഥികളും അവരുടെ രക്ഷിതാക്കളും.
