സിഡ്നി: കുട്ടികൾക്കെതിരെയുള്ള ലൈംഗിക ചൂഷണ ഉള്ളടക്കങ്ങൾ തടയുന്നതുമായി ബന്ധപ്പെട്ട വിവരങ്ങൾ കൈമാറുന്നതിൽ പരാജയപ്പെട്ടതിനെ തുടർന്ന് എലോൺ മസ്കിന്റെ ഉടമസ്ഥതയിലുള്ള സോഷ്യൽ മീഡിയ പ്ലാറ്റ്ഫോമായ എക്സ് കോർപ്പറേഷന് ഓസ്ട്രേലിയൻ കോടതി വൻ തുക പിഴ ചുമത്തി. 6,50,000 ഓസ്ട്രേലിയൻ ഡോളറാണ് (ഏകദേശം 4,65,000 യു.എസ് ഡോളർ) ഓസ്ട്രേലിയൻ ജഡ്ജി കമ്പനിക്ക് പിഴയായി വിധിച്ചത്.
ഓൺലൈൻ സുരക്ഷാ വാച്ച്ഡോഗ് ആവശ്യപ്പെട്ട നിർണ്ണായക വിവരങ്ങൾ നൽകാത്തതിനാണ് ഈ കർശന നടപടി. 2023-ൽ പ്ലാറ്റ്ഫോമിലെ കുട്ടികളുടെ ലൈംഗിക ചൂഷണ ഉള്ളടക്കങ്ങൾ എങ്ങനെയാണ് കൈകാര്യം ചെയ്തത് എന്നതിനെക്കുറിച്ചുള്ള വിവരങ്ങൾ നൽകാൻ എക്സ് കോർപ്പറേഷനോട് അധികൃതർ ഔദ്യോഗികമായി ആവശ്യപ്പെട്ടിരുന്നു. എന്നാൽ, തങ്ങളുടെ പ്ലാറ്റ്ഫോമിലെ സുരക്ഷാ ക്രമീകരണങ്ങളെക്കു റിച്ചോ ഇത്തരം ഉള്ളടക്കങ്ങൾ നീക്കം ചെയ്യാൻ സ്വീകരിച്ച നടപടികളെക്കുറിച്ചോ കൃത്യമായ റിപ്പോർട്ട് സമർപ്പിക്കാൻ കമ്പനി തയ്യാറായില്ല.
കുട്ടികളുടെ ഓൺലൈൻ സുരക്ഷയിൽ യാതൊരുവിധ വിട്ടുവീഴ്ചയും അനുവദിക്കില്ലെന്ന കർശനമായ സന്ദേശമാണ് ഈ വിധിയിലൂടെ ഓസ്ട്രേലിയൻ കോടതി നൽകുന്നത്. ആഗോളതലത്തിൽ തന്നെ വലിയ രീതിയിൽ ചർച്ചയായിരിക്കുന്ന ഈ പിഴ നടപടി, വൻകിട സോഷ്യൽ മീഡിയ കമ്പനികൾ രാജ്യത്തെ നിയമങ്ങൾ പാലിക്കാൻ ബാധ്യസ്ഥരാണെന്ന് ഒരിക്കൽക്കൂടി അടിവരയിടുന്നു. സുരക്ഷാ മാനദണ്ഡങ്ങൾ പാലിക്കുന്നതിൽ പരാജയപ്പെടുന്ന ടെക് ഭീമന്മാർക്കെതിരെ വരും ദിവസങ്ങളിലും കർശന നടപടികളുമായി മുന്നോട്ട് പോകാനാണ് ഓസ്ട്രേലിയൻ അധികൃതരുടെ തീരുമാനം.
