തൊടുപുഴ: പിതാവ് പി.ജെ. ജോസഫിന്റെ രാഷ്ട്രീയ തട്ടകമായ തൊടുപുഴയിൽ കന്നിപ്പോരാട്ടത്തിന് ഇറങ്ങിയ അപു ജോൺ ജോസഫ് ചരിത്രവിജയവുമായി നിയമസഭയിലേക്ക്. കേരള കോൺഗ്രസ് സ്ഥാനാർത്ഥിയായി മത്സരിച്ച അപു, 44,291 വോട്ടുകളുടെ ഭീമമായ ഭൂരിപക്ഷത്തിനാണ് തൊടുപുഴ നിലനിർത്തിയത്. ഇടുക്കി ജില്ലയിലെ തന്നെ ഏറ്റവും ഉയർന്ന ഭൂരിപക്ഷമാണിത്.
കേരള കോൺഗ്രസ് (എം) സ്ഥാനാർത്ഥി സിറിയക് ചാഴികാടനെയാണ് അപു പരാജയപ്പെടുത്തിയത്. ആകെ 84,000-ത്തിലധികം വോട്ടുകൾ നേടിയ അപുവിന്റെ വിജയം, പി.ജെ. ജോസഫ് രാഷ്ട്രീയത്തിൽ നിന്ന് വിരമിച്ച ഒഴിവിലും മണ്ഡലത്തിൽ അദ്ദേഹത്തിനുള്ള സ്വാധീനം ഒട്ടും കുറഞ്ഞിട്ടില്ലെന്ന് തെളിയിക്കുന്നതാണ്. ആരോഗ്യപ്രശ്നങ്ങൾ കാരണം പി.ജെ. ജോസഫ് നേരിട്ട് പ്രചാരണ രംഗത്ത് സജീവമല്ലാതിരുന്നിട്ടും അപു നേടിയ ഈ വിജയം യുഡിഎഫ് ക്യാമ്പുകളിൽ വലിയ ആവേശമുണ്ടാക്കിയിട്ടുണ്ട്.
യുഡിഎഫിന്റെ ഉറച്ച കോട്ടയായ തൊടുപുഴയിൽ, പിതാവിന്റെ പിൻഗാമിയായി എത്തിയ അപു ജോൺ ജോസഫ് ഇതോടെ കേരള രാഷ്ട്രീയത്തിലെ ശ്രദ്ധേയമായ യുവസാന്നിധ്യമായി മാറുകയാണ്. യുഡിഎഫ് സർക്കാർ രൂപീകരണ ചർച്ചകളിലേക്ക് കടക്കുമ്പോൾ, മികച്ച വിജയം കാഴ്ചവെച്ച കേരള കോൺഗ്രസിന് (ജോസഫ് വിഭാഗം) രണ്ട് മന്ത്രിസ്ഥാനങ്ങൾ ലഭിക്കുമെന്ന സൂചനയുണ്ട്. ഇതോടെ അപു ജോൺ ജോസഫ് മന്ത്രിസഭയിലേക്കും പരിഗണിക്കപ്പെടുമെന്നാണ് രാഷ്ട്രീയ വൃത്തങ്ങൾ നൽകുന്ന വിവരം.
സംസ്ഥാനത്ത് യുഡിഎഫ് വലിയ മുന്നേറ്റം നടത്തിയ ഈ തിരഞ്ഞെടുപ്പിൽ, കേരള കോൺഗ്രസ് മത്സരിച്ച എട്ട് സീറ്റുകളിൽ ഏഴിടത്തും വിജയിച്ചു. പാർട്ടിയുടെ മികച്ച പ്രകടനവും അപുവിന്റെ വൻ ഭൂരിപക്ഷവും മുന്നണിക്കുള്ളിൽ പാർട്ടിയുടെ വിലപേശൽ ശേഷി വർദ്ധിപ്പിച്ചിട്ടുണ്ട്. വരും ദിവസങ്ങളിൽ മന്ത്രിസഭാ രൂപീകരണ ചർച്ചകൾ പൂർത്തിയാകുന്നതോടെ അപുവിന്റെ രാഷ്ട്രീയ ഭാവിയെക്കുറിച്ചുള്ള കൂടുതൽ വ്യക്തത ലഭിക്കും.
