പത്തനംതിട്ട: ആറന്മുള പാർത്ഥസാരഥി ക്ഷേത്രത്തിലെ ചരിത്രപ്രസിദ്ധമായ വള്ളസദ്യയ്ക്ക് തുടക്കമായി. ക്ഷേത്രത്തിന് മുന്നിലെ ആനക്കൊട്ടിലിൽ പ്രത്യേകം ഒരുക്കിയ വേദിയിലെ വിളക്കിൽ ക്ഷേത്രത്തിൽ നിന്ന് പകർന്നു നൽകിയ ദീപം തെളിയിച്ച് ദേവസ്വം, ആരോഗ്യ വകുപ്പ് മന്ത്രി കെ. മുരളീധരൻ വള്ളസദ്യയുടെ ഉദ്ഘാടനം നിർവ്വഹിച്ചു. തുടർന്ന് തൂശനിലയിൽ വിഭവങ്ങൾ വിളമ്പിയ മന്ത്രി, ക്ഷേത്രാങ്കണത്തിലെ ഓഡിറ്റോറിയത്തിൽ നടന്ന സദ്യയിലും പങ്കാളിയായി. ചടങ്ങുകളുടെ ആദ്യദിനത്തിൽ പത്ത് പള്ളിയോടങ്ങളാണ് വള്ളസദ്യയിൽ പങ്കെടുത്തത്.
ഈ വർഷം 51 പള്ളിയോടങ്ങൾക്കായി സെപ്റ്റംബർ 16 വരെയാണ് വള്ളസദ്യ വഴിപാടായി നടക്കുക. വള്ളസദ്യയിൽ പങ്കെടുക്കാൻ ആഗ്രഹിക്കുന്ന തീർഥാടകർക്ക് ഇല ഒന്നിന് 300 രൂപ നിരക്കിൽ aranmulaboatrace.com എന്ന ഔദ്യോഗിക വെബ്സൈറ്റിലൂടെ ബുക്ക് ചെയ്ത് പ്രത്യേക പാസ് സ്വന്തമാക്കാവുന്നതാണ്. മേളയുടെ ഭാഗമായി ഓഗസ്റ്റ് 30 ന് പ്രശസ്തമായ ഉതൃട്ടാതി ജലമേളയും, സെപ്റ്റംബർ നാലിന് അഷ്ടമിരോഹിണി സമൂഹ വള്ളസദ്യയും നടക്കും.
ഉദ്ഘാടന ചടങ്ങിൽ കേന്ദ്ര സഹമന്ത്രി സുരേഷ് ഗോപി, ആന്റോ ആന്റണി എംപി, എംഎൽഎമാരായ അബിൻ വർക്കി, പഴകുളം മധു, വർഗീസ് മാമൻ, മുൻ ഗോവ ഗവർണർ പി. എസ്. ശ്രീധരൻ പിള്ള എന്നിവർ പങ്കെടുത്തു. ഇവരെ കൂടാതെ ജില്ലാ പഞ്ചായത്ത് പ്രസിഡൻറ് ദീനാമ്മ റോയി, വൈസ് പ്രസിഡൻറ് അനീഷ് വരിക്കണ്ണാമല, ജില്ലാ പോലീസ് മേധാവി ആർ. ആനന്ദ്, എഡിഎം ആർ. രാജലക്ഷ്മി, പള്ളിയോട സേവാ സംഘം പ്രസിഡൻറ് കെ. വി. സാംബദേവൻ, പള്ളിയോട സേവാസംഘം ഭാരവാഹികൾ, വിവിധ ജനപ്രതിനിധികൾ തുടങ്ങിയവരും ചടങ്ങിൽ സന്നിഹിതരായിരുന്നു.
