മെൽബൺ: ഓസ്‌ട്രേലിയയിൽ സ്വന്തം ഓഫീസ് പരിസരത്തുവെച്ചുണ്ടായ വാഹനാക്രമണത്തിൽ ഇരു കാലുകളും നഷ്ടപ്പെട്ട ഇൻഡിപ്പൻഡന്റ് എം.പി ഹെലൻ ഹെയ്ൻസിന്റെ (Helen Haines) ആരോഗ്യനിലയിൽ നേരിയ പുരോഗതി. മെൽബണിലെ ആൽഫ്രഡ് ആശുപത്രിയിൽ ചികിത്സയിലുള്ള അവരുടെ നില ഗുരുതരമായി തുടരുന്നുണ്ടെങ്കിലും നിലവിൽ സ്ഥിരത കൈവരിച്ചതായി ആശുപത്രി അധികൃതർ അറിയിച്ചു.
തിങ്കളാഴ്ച ഉച്ചകഴിഞ്ഞ് വിക്ടോറിയയിലെ വാങ്കരട്ടയിലുള്ള ഇലക്ടറേറ്റ് ഓഫീസിന് സമീപത്തുവെച്ചാണ് ഹെലൻ ഹെയ്ൻസിനെ കാറിടിച്ച് വീഴ്ത്തിയത്. വലതുകാൽ ശസ്ത്രക്രിയയിലൂടെ രക്ഷപ്പെടുത്താൻ ഡോക്ടർമാർ പരമാവധി ശ്രമിച്ചെങ്കിലും പരിക്കുകൾ അതീവ ഗുരുതരമായതിനാൽ ഇരു കാലുകളും മുറിച്ചുമാറ്റേണ്ടി വന്നു.
സംഭവവുമായി ബന്ധപ്പെട്ട് സമീപവാസിയായ ബ്രെൻഡൻ ന്യൂജന്റ് (43) എന്നയാളെ പോലീസ് അറസ്റ്റ് ചെയ്തു. ഗുരുതരമായ പരിക്കേൽപ്പിക്കൽ, അശ്രദ്ധമായി വാഹനം ഓടിക്കൽ, പൊതുപ്രവർത്തകരെ ആക്രമിക്കൽ തുടങ്ങിയ വകുപ്പുകൾക്ക് പുറമെ കഞ്ചാവ് കൈവശം വെച്ചതിനും ഇയാൾക്കെതിരെ കേസെടുത്തിട്ടുണ്ട്. കോടതിയിൽ ഹാജരാക്കിയ പ്രതി ജാമ്യത്തിന് അപേക്ഷിച്ചിട്ടില്ല.
അക്രമം ഓസ്‌ട്രേലിയൻ രാഷ്ട്രീയത്തിൽ വലിയ ഞെട്ടലുണ്ടാക്കിയിട്ടുണ്ട്. ജനപ്രതിനിധികളുടെ സുരക്ഷ കൂടുതൽ ശക്തമാക്കണമെന്ന ചർച്ചകൾക്കും ഇത് വഴിവെച്ചു. ഹെലൻ ഹെയ്ൻസിന് പിന്തുണ പ്രഖ്യാപിച്ച് പൊതുജനങ്ങൾ ഒത്തുചേർന്ന് പ്രാർത്ഥനാ സംഗമം സംഘടിപ്പിച്ചു. കൂടാതെ, അവരുടെ നിർദേശപ്രകാരം കുട്ടികളുടെ ക്ഷേമത്തിനായി പ്രവർത്തിക്കുന്ന ‘സേവ് ദി ചിൽഡ്രൻ’ ഫണ്ടിലേക്ക് ജനങ്ങൾ ഇതിനകം 7.3 ലക്ഷത്തിലധികം ഓസ്‌ട്രേലിയൻ ഡോളർ സംഭാവനയായി നൽകിയിട്ടുണ്ട്.
